बाळासाहेब ठाकरे जयंतीनिमित्त धारावीत भव्य रक्तदान शिबिर यशस्वीपणे संपन्न

मुंबई प्रतिनिधी:  हिंदुहृदयसम्राट, शिवसेनाप्रमुख बाळासाहेब ठाकरे यांच्या जयंतीनिमित्त धारावी विधानसभेच्या वतीने भव्य रक्तदान शिबिराचे आयोजन करण्यात आले. “करूया रक्तदान, वाचूया प्राण” या घोषवाक्याखाली या शिबिराचे आयोजन करण्यात आले. खासदार अनिल देसाई यांनी 1000 रक्ताच्या बाटल्या संकलित करण्याचा निर्धार व्यक्त केला होता.

बाळासाहेब ठाकरे यांच्या विचारांना श्रद्धांजली समर्पित

शिवसेना पक्षाच्या वतीने या शिबिराचे आयोजन मुंबई, मुंबईकर आणि बाळासाहेब ठाकरे यांच्या विचारांना श्रद्धांजली म्हणून करण्यात आले. बाळासाहेब ठाकरे यांनी मराठी माणसाच्या हक्कांसाठी आयुष्यभर संघर्ष केला. त्यांच्या स्मृतीप्रित्यर्थ रक्तदानाचा हा विधायक उपक्रम राबवण्यात आला.

या शिबिरासाठी आमदार महेश सावंत आणि विभाग प्रमुख विठ्ठल पवार यांच्या नेतृत्वाखाली विशेष तयारी करण्यात आली होती. स्थानिक शिवसैनिक, युवक, नागरिक आणि विविध सामाजिक संस्थांनी या उपक्रमात मोठ्या प्रमाणात सहभाग घेतला.

शिवसेनेचा सामाजिक उपक्रम

रक्तदान हेच श्रेष्ठ दान मानले जाते, कारण अपघात, गंभीर आजार आणि शस्त्रक्रियांसाठी नेहमीच रक्ताची गरज भासते. गरजू रुग्णांना मदतीचा हात देण्यासाठी शिवसेनेच्या वतीने या शिबिराचे आयोजन करण्यात आले होते.

या कार्यक्रमाला नगरसेवक वसंत नकाशे, टी.एम. जगदीश, मरियम्मल टेवर, हर्षला मोरे, शाखाप्रमुख, उपशाखाप्रमुख, गटप्रमुख, महिला आघाडी आणि शिवसैनिक मोठ्या संख्येने उपस्थित होते.

नागरिकांचा उत्स्फूर्त प्रतिसाद
शिबिराच्या यशस्वी आयोजनासाठी मोठ्या प्रमाणावर तयारी करण्यात आली होती. नागरिकांनी देखील या पुण्यकार्यात मोठ्या संख्येने सहभागी होत रक्तदान केले. “रक्तदान करून आपण कोणाच्यातरी जीवन वाचवू शकतो,” या भावनेतून अनेक युवकांनी पुढाकार घेतला.

या उपक्रमामुळे धारावीतील गरजू रुग्णांना मोठा आधार मिळणार आहे. भविष्यातही अशा प्रकारच्या समाजोपयोगी उपक्रमांचे आयोजन करण्यात येईल, असे आयोजकांकडून सांगण्यात आले.