तालिका अध्यक्षांसोबत गैरवर्तन केल्याप्रकरणी भाजप चे १२ आमदार एका वर्षासाठी निलंबित..
सभागृहात गोंधळ घातल्याप्रकरणी तसेच तालिका अध्यक्षांसोबत उपाध्यक्षां च्या दालनात गैरवर्तणूक केल्याप्रकरणी भाजपाच्या १२ आमदारांचे आज एका वर्षासाठी निलंबन करण्यात आलं आहे.
भाजप चे पराग अळवणी, राम सातपुते, संजय कुटे, आशिष शेलार, अभिमन्यू पवार, गिरीश महाजन, अतुल भातखळकर, शिरीष पिंपळे, जयकुमार रावल, योगेश सागर, नारायण कुचे, किर्तीकुमार बागडिया यांना एक वर्षासाठी निलंबित करण्यात आलं आहे. हे निलंबन करण्यापूर्वी तालिका अध्यक्ष भास्कर जाधव यांनी आपली बाजू मांडली. त्यानंतर विरोधी पक्षनेते देवेंद्र फडणवीस यांनी आपली बाजू मांडली. देवेंद्र फडणवीस यांनी विनंती केली की, अशी कारवाई करू नका, मात्र त्यानंतरही १२ आमदारांवर कारवाई करण्यात आली. तालिका अध्यक्षांसोबत गैरवर्तन केलेल्या आमदारांच्या निलंबनाचा ठराव संसदीय कार्य मंत्री अनिल परब यांनी मांडला आणि तो मंजूर करण्यात आला.त्यावर विरोधी पक्षनेते देवेंद्र फडणवीस यांनी आक्षेप घेतला. सभागृहात हा ठराव एकतर्फी मांडण्यात आल्याचा आरोप त्यांनी केला. तसेच विरोधी पक्षाची सभागृहातील संख्या कमी करण्याचा प्रयत्न आहे, अशी घणाघाती टीका देवेंद्र फडणवीस यांनी केली.
