खासदार रविंद्र वायकरांच्या प्रयत्नांमुळे जोगेश्वरीकरांसाठी मनपा के-उत्तर कार्यालयाचे लोकार्पण

मुंबई – मुंबई उत्तर पश्चिम लोकसभा क्षेत्राचे खासदार रविंद्र वायकर यांच्या प्रयत्नांमुळे जोगेश्वरीकरांना लवकरच हक्काचे महानगरपालिकेचे स्वतंत्र कार्यालय मिळणार आहे. विधानसभा निवडणुकी पूर्वी पूनम नगर मंडई येथे महानगरपालिकेचे के-उत्तर ह्या कार्यालयाचे लोकार्पण करण्यात येणार आहे.

मुंबई महानगरपालीकेच्या के पूर्व कार्यालया अंतर्गत जोगेश्वरी (पूर्व) चा विभाग येतो. के-पूर्व विभागाची लोकसंख्या सुमारे ८.५० लाखांच्यावर आहे. एवढ्या मोठ्या लोकसंख्येला मनपा विभाग कार्यालयातील यंत्रणा अपुरी पडत होती. मनपामार्फत जनतेला अधिक चांगल्या सेवा देता याव्यात म्हणून जोगेश्वरी विधानसभा क्षेत्राचे तत्कालीन आमदार तसेच विद्यमान खासदार रविंद्र वायकर यांनी विधानसभेत विविध आयुधांच्या माध्यमातून जोगेश्वरीकरांसाठी स्वतंत्र मनपा कार्यालय सुरु करावे यासाठी वेळोवळी प्रश्न उपस्थित केले. संबंधित यंत्रणा यांच्या बरोबर बैठका ही घेतल्या. अखेर जोगेश्वरी (पूर्व) येथील पूनम नगर मंडईत मुंबई महागरपालिकेचे नवीन के-उत्तर कार्यालय सुरु करण्याचा निर्णय घेण्यात आला.

या लोकसभा क्षेत्राचे खासदार वायकर यांनी नुकतीच पूनम नगर मंडईत जाऊन मनपा कार्यालय सुरु करण्यासाठी सुरु असलेल्या कामाची पाहणी केली. यावेळी त्यांच्यासोबत के-पूर्वचे सहाय्यक आयुक्त मनीष वळूंज, मनपाचे अन्य अधिकारी, पदाधिकारी उपस्थित होते.

कार्यालय सुरु करण्यासाठी उर्वरीत काम लवकरात लवकर पूर्ण करण्यात येईल तसेच विधानसभा निवडणुकीपूर्वी के-उत्तर मनपा कार्यालयाचे लोकापर्ण करण्यात येईल, असे आश्वासन सहाय्यक आयुक्त यांनी खासदार वायकर यांना यावेळी दिले.