मुंबई- नीट-पीजीच्या समुपदेशनास दिरंगाई केल्याप्रकरणी आणि दिल्ली पोलिसांच्या कारवाईविरुद्ध दिल्लीतील निवासी डॉक्टरांच्या संपानंतर आता देशभरातील आरोग्य सेवा ठप्प होताना दिसत आहे.देशभरातील निवासी डॉक्टरांच्या संघटना आरोग्यसेवा पूर्णतः बंद ठेवणार असून, महाराष्ट्रासह अनेक राज्यातील निवासी डॉक्टरांनीही संपात सहभागी होण्याचा निर्णय घेतला आहे.
मुंबईतील केईएम आणि सायन हॉस्पिटलच्या निवासी डॉक्टरांच्या संघटनेने सांगितले की, ‘३० डिसेंबरपासून दुपारी २ वाजेनंतर बाह्यरुग्ण विभाग (ओपीडी), आपत्कालीन आणि अतिदक्षता विभागाची सेवा बंद केली जाईल. आसाम, पंजाब, उत्तर प्रदेश, ओडिशासह अनेक राज्यांतील निवासी डॉक्टरांच्या संघटनांनीही संपात सहभागी होणार असल्याची घोषणा केली आहे.
या संपाचा सामान्य रूग्णांना फटका बसणार असून यावर सरकारने लवकरात लवकर तोडगा काढावा अशी मागणी रूग्णांच्या नातेवाईकांकडून होताना दिसत आहे.
