कोकण; गणेशात्सवासाठी कोकण मार्गावर कोलाड-नांदगावरोड वेर्णा दरम्यान चालवण्यात आलेल्या बहुचर्चित अन देशातील पहिल्या- वहिल्या रो-रो कार सेवेचा प्रयोग पुरता फेलच ठरला. २३ ऑगस्ट रोजी अवघ्या ५ वाहनांसह धावलेल्या रो-रो कार सेवेची नंतर कोकणवासियांना धडधडच ऐकायला मिळाली नाही. परतीलाही अजूनही रो-रो कार सेवेच्या लाभासाठी गणेशभक्तांकडून ना विचारणा झाली. ना बुकींग यामुळे रो-रो कार सेवेचा पुरता फज्जाच उडाला आहे.
मुंबई-गोवा महामार्गाच्या रखडलेल्या कामामुळे दरवर्षीप्रमाणे यंदाही गणेशभक्तांची अडथळ्याची शर्यत पार करत गाव गाठले. गणेशभक्तांना गाव गाठताना कराव्या लागणाऱ्या कसरतीला ब्रेक लावण्यासाठी कोकण रेल्वे प्रशासन पुढे सरसावले होते. यासाठी गणेशभक्तांची हलक्या वजनाची वाहने वाहून नेण्यासाठी कोकण मार्गावर प्रथमच रो-रो कार सेवेचा प्रयोग करण्याचा महत्वाकांक्षी निर्णय घेतला. मात्र सुरूवातीपासूनच रो-रो कार सेवेकडे गणेशभक्तांनी पाठ फिरवली. रो-रो कार सेवेऐवजी कोकण मार्गावर जादा विशेष गाड्या चालवण्याचा आग्रह कोकणवासियांनी धरला होता.
कोकण रेल्वे प्रशासनाने अखेरपर्यंत अट्टाहास न सोडता सेवेच्या नोंदणीसाठी सलग चारवेळा मुदतवाढीचा फंडा वापरूनही गणेशभक्तांचा थंडाच प्रतिसाद लाभला. कोलाड येथे चढणारी वाहने थेट नांदगावरोड अथवा वेर्णा स्थानकात उतरवण्यात येणार होते. यासाठी भाडेही अवाजवी आकारण्यात येणार होते. नाकापेक्षा मोती जड अशीच अवस्था झाल्याने सेवेसाठीच अवघ्या ५ जणांचीच नोंदणी झाली होती. किमान १६ वाहनांची नोंदणी आवश्यक होती. अशाही बिकट परिस्थितीत कोकण रेल्वे प्रशासनाने अवघ्या ५ वाहनांसह पहिली वहिली रो-रो कार सेवा चालवली.
पहिल्या दिवशी म्हणजेच २३ ऑगस्ट रोजी धावलेल्या रो-रो कार सेवेचा अपवाद वगळता त्यानंतर रो-रो कार सेवा धावलीच नाही. यामुळे कोकण रेल्वे प्रशासनाचा पुरता भ्रमनिरास झाला. परतीच्या प्रवासात तरी रो-रो कार सेवेला गणेशभक्तांचा प्रतिसाद मिळेल, अशी कोकण रेल्वे प्रशासनाने बांधलेली अटकळ तूर्तास तरी फोल ठरल्याचे दिसून येत आहे.
