कोंकण-रत्नागिरी, सिंधुदुर्ग जिल्ह्यातील पाच पेट्रोल पंपांमध्ये मापात पाप केल्याबद्दल नोटीस बजावण्यात आली आहे. प्रत्येक पाच लिटरमध्ये २५ मिलि कमी पेट्रोल भरल्याने सहाय्यक नियंत्रक वैध मापन शास्त्र विभागाने ही कारवाई केली आहे. संबंधित पंप चालकांना त्यामध्ये सुधारणा करून आपला परवाना नूतनीकरण करण्याच्या सूचना दिल्या आहेत.
या विभागाच्या मुख्यालयातील पथकाने केलेल्या तपासणीत हे पुढे आले आहे. अशा प्रकारे कधीही अचानक तपासणी होण्याची शक्यता असल्याने पेट्रोल पंपधारकांमध्ये या पथकाची चांगलीच धास्ती निर्माण झाली आहे. शासनाच्या सहाय्यक नियंत्रण वैध मापनशास्त्र विभागामार्फत व्यापारात असणारे वजन काट्यांचे तराजू, इलेक्ट्रॉनिक काटे, मापन आदीचे वर्षाला नुतनीकरण करून घेतले जाते.
या उपकरणांची या विभागाकडून तपासणी होते. शासनाने त्या उपकरणाच्या आधारावर शुल्क आकारले आहे. ते शुल्क भरल्यानंतर त्याचे नुतनीकरण केले जाते. त्यामध्ये पेट्रोल पंपाचाही समावेश आहे.
