पत्रकारांचे महामंडळ कार्यान्वित करण्यासाठी सरकार प्रयत्नशील : धर्मरावबाबा आत्राम

गडचिरोली – पत्रकारांच्या मानधनात महायुती सरकारने दुप्पट वाढ केली, पत्रकारांसाठी स्वतंत्र महामंडळ असावे, अशी मागणी होती. त्यानुसार पत्रकारांचे महामंडळ तातडीने कार्यान्वित व्हावे, याकरिता सरकार प्रयत्नशील असल्याची ग्वाही अन्न व औषध प्रशासन मंत्री धर्मरावबाबा आत्राम यांनी दिली.

येथील गोंडवाना सैनिकी विद्यालयाच्या सभागृहात व्हॉईस ऑफ मीडियाच्या वतीने एक दिवसीय जिल्हास्तरीय अधिवेशन पार पडले, यावेळी अध्यक्षस्थानावरुन ते बोलत होते. गोंडवाना विद्यापीठाच्या सिनेट सदस्य तनुश्री धर्मरावबाबा आत्राम यांच्या हस्ते अधिवेशनाचे उद्घाटन झाले. व्हॉईस ऑफ मीडियाचे प्रदेशाध्यक्ष अनिल मस्के, विदर्भ विभागीय अध्यक्ष मंगेश खाटीक, विदर्भ विभागीय सचिव संजय पडोळे, इलेक्ट्रॉनिक मीडिया विंगचे राज्य प्रवक्ता महेश तिवारी, प्रदेश सहकार्यवाह संजय तिपाले, संघटनेचे जिल्हाध्यक्ष व्यंकटेश दुडमवार, जिल्हा कार्याध्यक्ष नसीर हाशमी उपस्थित होते.

धर्मरावबाबा आत्राम पुढे म्हणाले, माध्यमांचे स्वरुप बदलत आहे. डिजिटल माध्यमांमुळे लोकांना घटना, घडामोडींची माहिती तत्काळ होत आहे. जिल्ह्यात इंटरनेट व मोबाइल नेटवर्कचे जाळे वाढावे यासाठी सातत्याने प्रयत्न केले. त्यामुळे सुमारे सातशे मोबाइल टॉवर मंजूर झाले आहेत. त्यापैकी साडेतीनशेहून अधिक टॉवर उभारण्यात आले असून, उर्वरित काम युध्दपातळीवर सुरु आहे. या माध्यमातून दुर्गम, अतिदुर्गम भागात कनेक्टिव्हिटी वाढेल आणि नागरिकांना विविध योजनांचा लाभ घेणे अधिक सोपे होईल. पत्रकारांसाठी जिल्हास्तरावर भवन असावे, अशी मागणी आहे. यासाठी जागेचा शोध घ्या, भवन उभारुन तेथे पत्रकारांसाठी अद्ययावत सोयी-सुविधा पुरविण्यात येतील, असे आश्वासनही त्यांनी दिले.

यावेळी पत्रकारितेतील योगदानाबद्दल महेश तिवारी यांचा विशेष सत्कार करण्यात आला. प्रदेशाध्यक्ष अनिल मस्के यांनी संघटनेची वाटचाल व पत्रकारांसाठी राबविण्यात येणाऱ्या विविध उपक्रमांची माहिती दिली. पत्रकारांच्या हक्काची, त्यांच्यासाठी लढणारी ही संघटना असल्याचे त्यांनी नमूद केले.

विदर्भ विभागीय अध्यक्ष मंगेश खाटीक यांनी पत्रकारांचे आरोग्य हा सर्वात महत्त्वाचा विषय आहे. यावर संघटनेने काम केले. त्यातूनच माध्यमकर्मींचा दहा लाख रुपयांपर्यंतचा विमा काढण्यात आला. पत्रकारांसाठी निस्वार्थ भावनेने उभारलेला हा लढा असून, यात अधिकाधिक संख्येने सहभागी व्हावे, असे आवाहन त्यांनी केले.

महेश तिवारी यांनीही आपले मनोगत व्यक्त केले. प्रास्ताविक जिल्हाध्यक्ष व्यंकटेश दुडमवार यांनी केले. या कार्यक्रमाला साप्ताहिक विंगचे प्रदेश कार्यकारिणी सदस्य मुकुंद जोशी, साप्ताहिक विंगच्या जिल्हाध्यक्ष रेखा वंजारी, डिजिटल विंगचे जिल्हाध्यक्ष गणेश शिंगाडे, जिल्ह्यातील सर्वच जिल्हा पदाधिकारी, तालुका पदाधिकारी तसेच सर्व व्हॉईस मीडीयाचे सदस्य उपस्थित होते.

पत्रकारांच्या पाल्यांना शैक्षणिक साहित्य : या अधिवेशनात पत्रकारांच्या दहावी-बारावीतील गुणवंत पाल्यांचा सत्कार पार पडला. यावेळी मान्यवरांच्या हस्ते या विद्यार्थ्यांना शैक्षणिक साहित्याची कीट भेट स्वरुपात देण्यात आली.