पत्रकारांना कोरोना वॉरीयर्स म्हणून प्राधान्याने लस देण्याबाबत सिंधुदुर्ग जिल्हा राज्यात अव्वल !
सिंधुदुर्ग,दि.२: ४५ वर्षांखालील पत्रकारांना कोरोना प्रतिबंधक लसीकरण सुरू करावे, अशी आग्रही मागणी पत्रकार संघटनांकडून मुख्यमंत्र्यांपासून ते राज्याच्या राज्यपालांकडे करण्यात आली होती. कोरोना काळात स्वतःच्या जीवाची बाजी लावून वृत्तांकनासाठी फिल्डवर्क करणारे आणि त्या बातम्या जगभरात पोचवणारे पत्रकार यांना फ्रंटलाईन वर्कर म्हणून कोरोना लस द्यावी, अशी मागणी पत्रकार संघटना करताहेत. याची दखल घेत जि. प. अध्यक्षा संजना सावंत यांनी आपल्या अधिकारांचा वापर करत जि. प. मुख्य कार्यकारी अधिकारी आणि जिल्हा आरोग्य अधिकाऱ्यांना सिंधुदुर्गातील ४५ वर्षांखालील पत्रकारांना लसीकरण करण्याचे आदेश दिले. आणि २ जून रोजी कणकवली तालुक्यातील पत्रकारांना कोविड प्रतिबंधात्मक लसीकरण सुरू झाले. त्यामुळे जिल्हा परिषद अध्यक्ष संजना सावंत यांचे तालुक्यातील पत्रकारांनी आभार व्यक्त केले आहे.
