लोककलेच्या मानकऱ्यांना आर्थिक आधार द्या; दशावतारी व भजनी कलाकारांसाठी पेन्शनची मागणी
दशावतारी आणि भजनी कलाकारांना पेन्शन द्या; आमदार सुनील प्रभू यांची
विधानसभेत मागणी
मुंबई, दि. : दशावतारी आणि भजनी कलाकारांना उतारवयात आर्थिक आधार मिळावा यासाठी त्यांना पेन्शन योजना लागू करावी, अशी मागणी शिवसेना नेते आमदार सुनील प्रभू यांनी विधानसभेत केली. या मागणीवर सांस्कृतिक कार्यमंत्री आशिष शेलार यांनी सकारात्मक प्रतिसाद देत यासंदर्भात बैठक घेऊन योग्य निर्णय घेण्यात येईल, असे आश्वासन दिले.
विधानसभा सभागृहात आमदार निलेश राणे यांनी लक्षवेधी सूचनेद्वारे दशावतारी कलाकारांच्या विविध समस्यांकडे सरकारचे लक्ष वेधले. यावेळी चर्चेत सहभागी होत आमदार सुनील प्रभू यांनी दशावतारी तसेच भजनी कलाकारांच्या आर्थिक अडचणी सभागृहासमोर मांडल्या.
दशावतारी आणि भजनी कलाकारांनी आयुष्यभर कला व संस्कृतीचे जतन करण्यासाठी योगदान दिले आहे. मात्र, उतारवयात त्यांना कोणताही नियमित आर्थिक आधार उपलब्ध नसल्याने अनेक कलाकारांना अडचणींचा सामना करावा लागतो. त्यामुळे या कलाकारांना किमान पेन्शनच्या माध्यमातून आर्थिक मदत उपलब्ध करून द्यावी, अशी मागणी आमदार प्रभू यांनी केली.
यापूर्वी २०१९ मध्ये तत्कालीन सांस्कृतिक कार्यमंत्री अमित देशमुख यांच्याकडेही अर्थसंकल्पीय अधिवेशनात दशावतारी आणि भजनी कलाकारांसाठी पेन्शनची तरतूद करण्याची मागणी केल्याचे त्यांनी सभागृहात नमूद केले.
“दशावतारी आणि भजनी मंडळातील कलाकारांनी महाराष्ट्राच्या लोककलेची परंपरा जपली आहे. त्यांच्या योगदानाचा विचार करून त्यांना पेन्शनच्या स्वरूपात मदत मिळणे आवश्यक आहे. यामुळे या कलाकारांना मोठा दिलासा मिळेल,” असे आमदार सुनील प्रभू यांनी सांगितले.
यावर उत्तर देताना सांस्कृतिक कार्यमंत्री आशिष शेलार यांनी या विषयावर समिती स्थापन करून लवकरच बैठक घेण्यात येईल आणि त्यानंतर सकारात्मक निर्णय घेण्यात येईल, असे आश्वासन दिले.
