अलिबाग – ४० ते ५० प्रवासी घेऊन निघालेल्या अलिबाग पेण मार्गावर कार्लेखिंड येथे एस टी बसला अपघात झाला. अवघड वळणावर चालकाचे गाडीवरील नियंत्रण सुटून गाडी एका बाजूला बॅरीगेटवर कलंडली. बसमधील प्रवाशांना सुखरूप खाली उतरवून पोलीस व अन्य यंत्रणांच्या सहाय्याने गाडी सरळ करण्यात आली. ही बस अलिबाग हून पनवेलकडे निघाली होती.
४० ते ५० प्रवासी या बसमधून प्रवास करत होते. बस रस्त्याच्या कडेला असलेल्या संरक्षक कठड्यांना आणि झाडांना अडकल्याने मोठी दुर्घटना टाळली. या अपघातात ३ ते ४ जण किरकोळ जखमी झाले. त्यांना अलिबाग येथील जिल्हा सामान्य रुग्णालयात उपचारासाठी आणण्यात आले आहे. या मार्गावरील वाहतूक सुरळीत सुरू आहे.
