सिंधुदुर्गात शिंदे सेनेत जोरदार ‘इन्कमिंग’ सुरु…!

कुडाळ : सिंधुदुर्ग जिल्ह्यात शिंदे सेनेत उबाठा, काँग्रेस व अन्य पक्षांमधून जोरदार ‘इनकमिंग’ सुरु असून पक्ष संघटनेत मोठया प्रमाणावर फेरबदल करण्यात आले आहेत. जिल्हा सेनेची नवीन कार्यकारिणी व काही नव्या पदाधिकाऱ्यांच्या नेमणूकाही यावेळी जाहीर करण्यात आल्या.

कुडाळ -मालवणचे सेना आमदार निलेश राणे यांच्या उपस्थितीत जिल्हाध्यक्ष दत्ता सामंत यांनी आज येथे एका पत्रकार परिषदेत ही घोषणा करत या नव्या नेमणूका जाहीर केल्या. या पत्रकार परिषदेला उपनेते संजय आंग्रे संजय पडते दादा साईल उपस्थित होते.

जिल्ह्यात अन्य पक्षातील अनेक नेते, आजी -माजी सरपंच, उप-सरपंच,सदस्य, माजी जि.प.व प.स. सदस्य कार्यकर्ते मोठ्या प्रमाणावर आमच्या पक्षात यायला इच्छुक असून लवकरच त्यांच्या प्रवेशाचा कार्यक्रम होईलच शिवाय जिल्ह्याच्या पक्ष संघटनेत बदल करण्यात येऊन यापैकी काहींना पदे देण्यात येतील.

राज्याचे उप-मुख्यमंत्री आणि पक्षाध्यक्ष एकनाथ शिंदे यांच्याशी सल्लामसलत करून या नियुक्त्या करण्यात येतील असे आमदार निलेश राणे यांनी यावेळी स्पष्ट केले. आगामी स्थानिक स्वराज्य संस्थांच्या निवडणुका लक्षात घेऊन हे फेरबदल व नियुक्त्या करण्यात येते आहेत असेही त्यांनी स्पष्ट केले.

कुडाळ-मालवण आणि सावंतवाडी या सेनेचे आमदार असलेल्या दोन मतदारसंघात तर हे ‘इन्कमिंग’ जोरात सुरु असल्याचे राणे म्हणाले. स्थानिक स्वराज्य संस्था निवडणुकीच्या वेळी महायुती जो निर्णय घेईल तो आम्हाला मान्य असेल असे राणे यांनी स्पष्ट केले.

शिवसेनेच्या जिल्हा सरचिटणीसपदी दादा साईल, महिला जिल्हाप्रमुखपदी दीपलक्ष्मी पडते, उप-जिल्हाप्रमुखपदी अरविंद करलकर, महेश राणे, जिल्हा समन्वयकपदी मालवणचे माजी नगराध्यक्ष महेश कांदळगावकर यांची नियुक्ती करण्यात आली आहे.

तसेच तालुका व शहर प्रमुखांची निवडही यावेळी जाहीर करण्यात आली. ओरोस मंडळ अध्यक्ष दीपक नारकर, कुडाळ मंडळ अध्यक्ष विनायक राणे, मालवण मंडळ अध्यक्ष राजा गावडे, मालवण मंडळ अध्यक्ष विनायक बाईक, कुडाळ शहर प्रमुख ओंकार तेली, मालवण शहर प्रमुख दीपक पाटकर, मालवण उपतालुकाप्रमुख बाळू नाटेकर यांची नियुक्ती करण्यात आली आहे. आमदार राणे यांनी या नूतन पदाधिकाऱ्यांचे अभिनंदन करून त्यांना शुभेच्छा दिल्या.