मुंबई।महाविकास आघाडी सरकार व मुंबई महापालिकेच्या निष्क्रिय कारभारामुळे वंचित राहणाऱ्या १८ ते ४४ वर्ष वयोगटातील नागरिकांचे लसीकरण करण्याकरिता मुंबई भाजपा प्रभारी व कांदिवली पूर्वचे आमदार अतुल भातखळकर यांच्या माध्यमातून आणि अपोलो हॉस्पिटल व स्पंदन सामाजिक संस्था यांच्या सहकार्यातुन चिल्ड्रन्स अकॅडमी, मालाड पूर्व येथे आयोजित तीन दिवसीय विशेष लसीकरण मोहिमेचे शुक्रवारी आ. अतुल भातखळकर यांच्या हस्ते उद्घाटन करण्यात आले.
महाविकास आघाडी सरकार व मुंबई महानगरपालिका यांनी १८ ते ४४ वयोगटातील नागरिकांचे मोफत लसीकरण करण्याची घोषणा केली खरी परंतु ग्लोबल टेंडर मधील आगाऊ भरणा करणार नसल्याच्या अटीमुळे अनेक कंपन्यांनी लस देण्यास असमर्थता दर्शवली आहे. इतकेच नव्हे तर मुंबईतील ४५ पेक्षा जास्त वयोगटासाठी केंद्र सरकारकडून पाठविण्यात आलेल्या लसी आपापल्या जिल्ह्यांत व बॉलिवूड मधील लोकांसाठी वापरण्याचा प्रकार सुद्धा ठाकरे सरकारमधील मंत्र्यांकडून केला जात आहे. त्यामुळे मुंबईतील 18 ते 44 वयोगटातील लाखो नागरिक लसीकरणापासून वंचित आहेत. त्यामुळेच आमदार अतुल भातखळकर यांनी आपल्या प्रयत्नातून 4, 5 व 6 जून या तीन दिवसीय विशेष लसीकरण मोहीमचे आयोजन केले असून या अंतर्गत 18 ते 44 वयोगटातील किमान 5000 नागरिकांचे लसीकरण करण्यात येणार आहे, तसेच भविष्यात अशा प्रकारचे आणखी लसीकरण अभियान आयोजित करणार असल्याचे सुद्धा आमदार अतुल भातखळकर म्हणाले. तसेच या लसीकरण मोहिमेअंतर्गत माध्यमकर्मी व पत्रकारांच्या अविरत सेवेबद्दल कृतज्ञता व्यक्त करण्यासाठी 18 ते 44 वयोगटातील 100 पेक्षा जास्त पत्रकारांचे सुद्धा मोफत लसीकरण करण्यात येणार असल्याचे आ. भातखळकर यांनी सांगितले.
