नव्या कामगार कायद्यांना बळ ; ‘मास्टर ट्रेनर्स’ घडवण्याचे आवाहन

मुंबई | प्रतिनिधी

बदलत्या औद्योगिक आणि आर्थिक परिस्थितीत नवीन कामगार संहितांची प्रभावी अंमलबजावणी करण्यासाठी सक्षम, प्रशिक्षित आणि अभ्यासू अधिकारी वर्ग तयार होणे आवश्यक असल्याचे प्रतिपादन कामगार मंत्री ॲड. आकाश फुंडकर यांनी केले. प्रशिक्षण घेतलेले अधिकारी केवळ प्रशिक्षणार्थी न राहता ‘मास्टर ट्रेनर’ म्हणून पुढे यावेत आणि नवीन कामगार कायद्यांचे ज्ञान विभागातील इतर अधिकारी व कर्मचाऱ्यांपर्यंत पोहोचवावे, असेही त्यांनी सांगितले.

परळ येथील ना. मे. लोखंडे महाराष्ट्र श्रम विज्ञान संस्थेच्या वतीने आयोजित ‘नवीन कामगार संहिता आणि कामगार कायद्यातील बदल’ या विषयावरील चार दिवसीय प्रशिक्षण कार्यक्रमात ते बोलत होते.

यावेळी मंत्री फुंडकर म्हणाले की, कामगार विभाग हा शासन आणि समाज यांच्यातील महत्त्वाचा दुवा असून कामगारांचे संरक्षण, सामाजिक सुरक्षा आणि उद्योगांच्या प्रगतीमध्ये विभागाची भूमिका महत्त्वपूर्ण आहे. त्यामुळे अधिकाऱ्यांनी आपल्या जबाबदाऱ्या संवेदनशीलतेने आणि कार्यक्षमतेने पार पाडत नवीन कामगार संहितांचा लाभ कामगार आणि उद्योग क्षेत्रापर्यंत पोहोचवण्यासाठी प्रयत्नशील राहावे.

संस्थेच्या संचालक रोशनी कदम-पाटील यांनी प्रशिक्षण कार्यक्रमाची उद्दिष्टे स्पष्ट करत अधिकारी वर्गाच्या भूमिकेवर प्रकाश टाकला. राज्यातील विविध विभागांतील कामगार अधिकारी, प्रशिक्षणार्थी तसेच संस्थेचे अधिकारी आणि कर्मचारी या कार्यक्रमाला उपस्थित होते.

नवीन कामगार संहितांच्या यशस्वी अंमलबजावणीसाठी प्रशिक्षित अधिकारी वर्ग हीच खरी ताकद असल्याचा संदेश या प्रशिक्षण कार्यक्रमातून देण्यात आला.