राज्यात ‘स्वरसम्राज्ञी आशा भोसले संगीत जीवन गौरव पुरस्कार’ सुरू होणार

गायन-संगीत क्षेत्रातील ज्येष्ठ कलावंतांचा होणार गौरव – सांस्कृतिक कार्य मंत्री ॲड. आशिष शेलार

मुंबई, दि. २ : महाराष्ट्रातील गायन-संगीत क्षेत्रात आयुष्यभर उल्लेखनीय योगदान देणाऱ्या ज्येष्ठ आणि ख्यातनाम कलावंतांचा गौरव करण्यासाठी सांस्कृतिक कार्य विभागामार्फत ‘स्वरसम्राज्ञी आशा भोसले संगीत जीवन गौरव पुरस्कार’ सुरू करण्यात येणार असल्याची घोषणा सांस्कृतिक कार्य मंत्री ॲड. आशिष शेलार यांनी विधानसभेत केली.

मंत्री शेलार म्हणाले की, संगीत, नाट्य, साहित्य, चित्रपट, लोककला आणि विविध सांस्कृतिक परंपरांनी समृद्ध असलेल्या महाराष्ट्राने देशाला अनेक दिग्गज कलाकार दिले आहेत. त्यांच्या योगदानामुळे महाराष्ट्राची सांस्कृतिक ओळख राष्ट्रीय आणि आंतरराष्ट्रीय स्तरावर अधिक दृढ झाली आहे.

स्वरसम्राज्ञी आशा भोसले यांनी आठ दशकांहून अधिक काळ विविध भारतीय भाषांमध्ये गायन करून भारतीय संगीतविश्वात अमूल्य योगदान दिले आहे. विशेषतः मराठीतील बालगीते, भावगीते, चित्रपटगीते, गझल, लावणी आणि लोकसंगीताला त्यांनी आपल्या वैशिष्ट्यपूर्ण आवाजाने समृद्ध केले आहे. त्यांच्या कर्तृत्वामुळे भारतीय संगीताला जागतिक स्तरावर नवी ओळख मिळाली असून त्यांची कार्यनिष्ठा, सातत्य आणि उत्कृष्टता अनेक पिढ्यांसाठी प्रेरणादायी ठरली आहे, असे त्यांनी सांगितले.

या पुरस्काराद्वारे गायन-संगीत क्षेत्रात प्रदीर्घ काळ उल्लेखनीय कार्य करणाऱ्या कलावंतांचा दरवर्षी गौरव करण्यात येणार आहे. पुरस्काराचे स्वरूप १० लाख रुपये रोख, शाल आणि सन्मानचिन्ह असे असेल.

पुरस्कारासाठी पात्रता निकष निश्चित करणे आणि पुरस्कारार्थींची निवड करण्यासाठी गायन-संगीत क्षेत्रातील तज्ज्ञांची समिती गठित करण्यात येणार असल्याची माहितीही मंत्री शेलार यांनी दिली.

दरवर्षी ८ सप्टेंबर, स्वरसम्राज्ञी आशा भोसले यांच्या जन्मदिनाचे औचित्य साधून किंवा त्या तारखेच्या जवळ हा पुरस्कार प्रदान करण्यात येईल, असेही मंत्री ॲड. आशिष शेलार यांनी सांगितले.