साहिल वाकोडे प्रकरणी सखोल चौकशीची मागणी; युवक काँग्रेसचे आंदोलन
आयआयटी बॉम्बेतील विद्यार्थी साहिल वाकोडे आत्महत्या प्रकरणी युवक काँग्रेसचे आंदोलन
जातीय भेदभावाच्या आरोपांची चौकशी करण्याची मागणी; प्रा. सूर्यनारायण डुल्ला यांच्यावर कारवाईची मागणी
मुंबई, दि. २१ सप्टेंबर : आयआयटी बॉम्बेतील विद्यार्थी साहिल वाकोडे यांच्या आत्महत्या प्रकरणी मुंबई युवक काँग्रेसच्या वतीने आयआयटी बॉम्बेच्या परिसरात आंदोलन करण्यात आले. या प्रकरणाची निष्पक्ष आणि पारदर्शक चौकशी करून दोषींवर कठोर कारवाई करावी, तसेच प्रा. सूर्यनारायण डुल्ला यांच्यावर कारवाई करून त्यांना सेवेतून बरखास्त करावे, अशी मागणी मुंबई युवक काँग्रेसच्या अध्यक्षा झीनत शबरीन यांनी केली.
झीनत शबरीन यांच्या नेतृत्वाखाली झालेल्या या आंदोलनात युवक काँग्रेसचे शेकडो कार्यकर्ते सहभागी झाले होते. यावेळी कार्यकर्त्यांनी घोषणाबाजी करत साहिल वाकोडे यांना न्याय देण्याची मागणी केली. आंदोलनादरम्यान पोलिसांनी कार्यकर्त्यांना ताब्यात घेत त्यांना पोलीस ठाण्यात नेल्याचा दावा युवक काँग्रेसकडून करण्यात आला.
यावेळी बोलताना झीनत शबरीन यांनी सांगितले की, साहिल वाकोडे यांच्या आत्महत्या प्रकरणी विद्यार्थ्यांनी १८ मागण्या केल्या असून युवक काँग्रेस त्यांना पाठिंबा देत आहे. आत्महत्या प्रकरणाचा सखोल तपास करण्यासोबतच आयआयटी बॉम्बेमध्ये जातीय भेदभाव आणि छळाचे आरोप असल्यास त्यांचीही स्वतंत्र चौकशी करण्यात यावी, अशी मागणी त्यांनी केली.
आयआयटी बॉम्बेमध्ये यापूर्वीही विद्यार्थ्यांच्या आत्महत्यांच्या घटना घडल्याचा उल्लेख करत संस्थात्मक उत्तरदायित्व निश्चित करणे, निर्णयप्रक्रियेत विद्यार्थ्यांचा सहभाग वाढवणे, मानसिक आरोग्य व समुपदेशनाच्या सुविधा अधिक सक्षम करणे तसेच तक्रार निवारणासाठी प्रभावी यंत्रणा उभारणे या विद्यार्थ्यांच्या मागण्यांकडे सरकारने तातडीने लक्ष द्यावे, असेही शबरीन यांनी म्हटले.
