मुंबई:– गाडी चालवण्याचा परवाना मिळवणे म्हणजे तारेवरची कसरत. मात्र,आता केंद्राने गाडी चालवण्याचा परवाना मिळवण्यासाठीचे नियम सुलभ केले आहेत. गाडी चालवण्याचा परवाना मिळवण्यासाठी ड्रायव्हिंग टेस्टची गरज लागणार नाही. गाडी चालवण्याचा परवाना मिळवण्यासाठी नियमांची दुरुस्ती करण्यात आली आहे. त्यानुसार तुम्हाला ट्रायव्हिंग टेस्टसाठी आरटीओमध्ये जाण्याची गरज नाही. केंद्रीय रस्ते परिवहन आणि महामार्ग मंत्रालयाने हे नवीन नियम लागू केले आहेत. या नियमामुळे ज्यांचा गाडी चालवण्याचा परवाना मिळवण्याचे बाकी आहे त्यांना मोठा दिलासा मिळणार आहे.
मंत्रालयाने जारी केलेल्या नियमानुसार गाडी चालवण्याचा परवाना मिळण्यासाठी ज्यांनी आरटीओकडे अर्ज केला आहे.अशा अर्जदारांना कुठल्याही मान्यताप्राप्त ड्रायव्हिंग ट्रेनिंग स्कूलमध्ये जावे लागेल आणि आपल्या नावाची नोंदणी करावी लागेल. तसंच अर्जदारांना ड्रायव्हिंग ट्रेनिंग स्कूलकडून प्रशिक्षण घ्यावे लागणार आहे आणि तिथेच ड्रायव्हिंग चाचणी द्यावी लागणार आहे. गाडी चालक परवाना अर्जदारांना एक प्रमाणपत्र देण्यात येईल. या प्रमाणपत्राच्या आधारावर अर्जदाराला गाडी चालवण्याचा परवाना मिळेल.
अधिकृत एजन्सीकडे दुचाकी, तीनचाकी आणि हलक्या वाहनांच्या प्रशिक्षणासाठी ड्रायव्हिंग स्कूलकडे एक एकर जमीन असणे बंधनकारक आहे. तसेच मध्यम आणि अवजड वाहनांचे प्रशिक्षण देण्यासाठी ड्रायव्हिग स्कूलकडे दोन एकर जमीन असणे बंधनकारक असणार आहे. प्रशिक्षकाचे शिक्षण कमीत कमी १२ वी पास असणे बंधनकारक असून त्याला पाच वर्षाचा गाडी चालवण्याचा अनुभव आणि वाहतुकीच्या नियमांचे योग्य आकल असणे नियमांत बंधनकारक आहे.
