ऑनलाइन शिक्षणासाठी गावातील प्रतिष्ठितांकडून मोबाइल घ्या ! सोलापूर शिक्षणाधिकाऱ्यांचा अजब आदेश
सोलापूर – राज्यात कोरोना संसर्गाच्या पार्श्वभूमीवर १५ फेब्रुवारीपर्यंत सर्व शाळा आणि महाविद्यालये बंद ठेवण्याचे आदेश राज्य सरकारकडून देण्यात आले असून पुन्हा एकदा ऑनलाइन शिक्षणाला प्राधान्य देण्याचे आदेश देण्यात आले आहे. अशातच प्रत्येक विद्यार्थ्यांस ऑनलाईन शिक्षण मिळावे म्हणून गरज पडल्यास गावातील प्रतिष्ठित व्यक्तीचा भ्रमणध्वनी संच मागा,असा अजब आदेश सोलापूर शिक्षणाधिकाऱ्यांनी दिला आहे. या आदेशामुळे शिक्षकांमध्ये संताप व्यक्त केला जात आहे.
प्राथमिक शिक्षक समितीचे राज्य सरचिटणीस विजय कोंबे यांनी प्रसारमाध्यमाला दिलेल्या मुलाखतीत या अजब आदेशाबाबत माहिती दिली आहे. ते म्हणाले, ‘कोण आपला मोबाईल दुसऱ्याकडे सुपूर्द करेल? शिक्षक संघटनांचा ऑनलाइन शिक्षणास विरोध नाही. मात्र प्रामुख्याने ग्रामीण भागातील पालकांकडे असे मोबाईल आहेत का? इंटरनेट सुविधा, त्यावर खर्च करण्याची तयारी याचाही विचार झाला पाहिजे’.
तसेच राज्य सरकारच्या आदेशात मोबाईलचा प्रभावी वापर करून शिक्षण देण्याचे नमूद आहे. या पार्श्वभूमीवर प्राथमिक शिक्षक समितीने सावध भूमिका घेतली आहे. ज्या विद्यार्थ्यांकडे मोबाइल आहे आणि पालक त्याच्याकडे लक्ष देऊन अभ्यास करून घेत असतील, अशाच विद्यार्थ्यांची संख्या प्रशासनास सांगावी, अशी विनंती संघटनेने शिक्षकांना केली आहे. असे न केल्यास मनस्ताप होण्याचा इशाराही त्यांनी दिला आहे.
