दहावीतल्या निधी पावसकरचा स्तुत्य उपक्रम; पिगी बँकेतील १० हजारांची बचत मुख्यमंत्री दुष्काळ निधीसाठी सुपूर्द

मुंबई :

सामाजिक संकटाच्या काळात मदतीचा हात पुढे करण्यासाठी वयाची मर्यादा नसते, हे मुंबईतील एका दहावीत शिकणाऱ्या विद्यार्थिनीने आपल्या कृतीतून सिद्ध केले आहे. ‘मिरर महाराष्ट्र’ आणि ‘गोरेगाव मिरर’चे ज्येष्ठ पत्रकार व संपादक महेश पावसकर यांच्या कन्येने आपल्या पिगी बँकेत वर्षभरात जमा केलेली १० हजार रुपयांची बचत मुख्यमंत्री दुष्काळ निधीसाठी दान केली आहे.

‘वर्षा’ या मुख्यमंत्र्यांच्या शासकीय निवासस्थानी झालेल्या भेटीदरम्यान तिने मुख्यमंत्री देवेंद्र फडणवीस यांच्याकडे १० हजार रुपयांचा धनादेश सुपूर्द केला.

राज्यातील दुष्काळग्रस्त नागरिक आणि शेतकऱ्यांना मदत व्हावी, या भावनेतून तिने हा निर्णय घेतला. खाऊसाठी मिळणारे पैसे तसेच इतर खर्चातून वाचवलेली रक्कम तिने वर्षभर आपल्या पिगी बँकेत जमा केली होती. स्वतःच्या गरजांसाठी खर्च न करता ही संपूर्ण बचत दुष्काळग्रस्तांच्या मदतीसाठी देण्याचा तिचा निर्णय कौतुकास्पद ठरला आहे.

या छोट्याशा वयात दाखवलेली सामाजिक बांधिलकी आणि इतरांच्या दुःखाची जाणीव पाहून मुख्यमंत्री देवेंद्र फडणवीस यांनी तिचे विशेष कौतुक केले. तिच्या या योगदानामुळे समाजातील इतरांनाही मदतीसाठी पुढे येण्याची प्रेरणा मिळेल, असे त्यांनी नमूद केले. तसेच तिच्या सामाजिक जाणिवेचे कौतुक करत उज्ज्वल भविष्यासाठी शुभेच्छा दिल्या.

या प्रसंगी तिचे वडील तथा ज्येष्ठ पत्रकार महेश पावसकर आणि कुटुंबीय उपस्थित होते.

एका विद्यार्थिनीने आपल्या छोट्याशा बचतीतून केलेली ही मदत सामाजिक संवेदनशीलता, दातृत्व आणि माणुसकीचा सुंदर संदेश देणारी ठरली आहे.