खेळाडूंवरील अन्यायाला थांबवणार! उदय सामंतांनी दिले महाराष्ट्र कबड्डी असोसिएशनची निवडणूक लढविण्याचे संकेत
मुंबई : लाल मातीतील कबड्डी खेळ हा स्थानिकांपुरता मर्यादित नसून आंतरराष्ट्रीय खेळाडू निर्माण करणे आवश्यक आहे. रत्नागिरीसह कोकणातील खेळाडूंवर राज्यस्तरावर अन्याय होतो हे आपण गेली तीन वर्ष पाहिले आहे. येथील खेळाडूंवर होणारा अन्याय दूर करण्यासाठी आपल्या सर्वांना महाराष्ट्र कबड्डी असोसिएशनची निवडणूक लढावी लागेल. यासाठी मी स्वतः पुढाकार घेवून निवडणूक लढवणार असल्याची घोषणा जिल्हा कबड्डी असोसिएशनचे अध्यक्ष तथा पालकमंत्री उदय सामंत यांनी केली. तालुक्यातील नांदिवडे येथील चंडिकादेवी नांदिवडे ग्रामस्थ आयोजित, बाबूशेठ पाटील मित्रमंडळ पुरस्कृत पुरूष व महिला गटांच्या कबड्डी स्पर्धांचा शुभारंभ पालकमंत्री उदय सामंत यांच्या हस्ते करण्यात आला. यावेळी माजी जिल्हा परिषद सदस्य प्रसाद उफर् बाबू पाटील, माजी जि.प. सभापती ऋतुजा जाधव, माजी सभापती मेघना पाष्टे, शाखाप्रमुख शिरधनकर, काव्या शिरधनकर, प्रमोद घाडगे, जयवंत आढाव, संदीप शिरधनकर, विभागप्रमुख बाबय कल्याणकर, बाबय फटकळे, अक्षय मेनये, कमलेश बापट, सुयोग बिवलकर आदी मान्यवर उपस्थित होते.
