वृद्ध साहित्यिक, लोककलावंतांच्या मानधनात होणार वाढ; कोकणातील भजनमंडळांना देखील मिळणार आर्थिक मदत-सुनील प्रभू

मुंबई:तमाशा, खडीगंमत, वासुदेव, पोतराज, चित्रकथी, बहुरूपी, कीर्तनकार, प्रबोधनकार, वारकरी सांप्रदायातील लोककलाकारांना दरमहा पेन्शन दिले जाते. मात्र कोरोना महामारीमुळे सांस्कृतिक कार्यक्रम न झाल्याने या कलाकारांवर उपासमारीची वेळ आली. प्रचंड महागाईमुळे त्यांना उदरनिर्वाह करणेही कठीण झाले असून या कलाकारांना मिळणार्‍या मानधनात वाढ करण्यात यावी. त्याचप्रमाणे मुंबईसह कोकणातील भजनमंडळांची नोंद घेऊन त्यांनाही आर्थिक सहकार्य मिळावे, अशी मागणी करणारी लक्षवेधी सूचना शिवसेनेचे मुख्य प्रतोद सुनील प्रभू यांच्यासह आमदार वैभव नाईक, राजन साळवी, भास्कर जाधव यांनी लावून धरली. शिवसेना आमदारांच्या या आग्रही मागणीची गांभीर्याने दखल घेत सांस्कृतिक कार्यमंत्री अमित देशमुख यांनी वृद्ध साहित्यिक, लोककलावंतांच्या मानधनात वाढ करण्यात येईल. त्याचप्रमाणे भजनी मंडळांचीही नोंद केली जाईल. पावसाळी अधिवेशनाआधी हे प्रश्न सोडविले जातील, अशी ग्वाही सांस्कृतिक कार्यमंत्री अमित देशमुख यांनी दिली.

शिवसेनेचे मुख्य प्रतोद सुनील प्रभू यांनी लक्षवेधी मांडताना राज्यातील लोकलावंत तसेच कलाकारांची कोरोनामुुळे झालेली अवस्था सभागृहासमोर मांडली. यावेळी त्यांनी भजनीबुवा तसेच कलाकारांचा आवर्जुन उल्लेख करताना मुंबईसह राज्यभरातील या कलाकारांची सांस्कृतिक विभागामार्फत नोंद घेण्यात येऊन त्यांना आर्थिक सहकार्य करावे, अशी मागणी केली.

मानधन योजनेत ओर्कस्ट्रा कलावंतांचाही समावेश करा – सुनील प्रभू

मुंबईसह राज्यात ऑर्वेâस्ट्रा कार्यक्रमाच्या माध्यमातूनही गायक, वादक, संयोजक हे उदरनिर्वाह करीत असतात. कोरोनाकाळात त्यांचेही मोठे नुकसान झाले आहे. मात्र या कलावंतांची कोणतीही नोंदणीकृत संस्था नसल्याने त्यांची शासनदरबारी नोंद नाही. त्यामुळे या कलाकारांना मानधन मिळत नसल्याने त्यांचीही नोंद करून त्यांना अर्थसहाय्य देण्यासाठी पात्र ठरविण्यात यावे, अशी मागणी सुनील प्रभू यांनी केली.

दशवतारी, पालखी, नमन, भारूड,प्रवचनाकारांचाही सहभाग करा

हे कलाकार लोककलेच्या माध्यमातून जनजागृती करतात, महाराष्ट्राची परंपरा जपतात. कोकणात शिमगा सण सुरू होत असून त्या पार्श्वभूमीवर या कलाकारांच्या मानधनाची घोषणा करा अशी मागणी राजन साळवी यांनी केली. तर सिंधुदुर्गातील असे कलाकार मोठ्या प्रमाणात असून त्यांची नोंद घेण्यात यावी, अशी मागणी वैभव नाईक यांच्याकडून करण्यात आली. यावेळी भास्कर जाधव यांनी कोकणातील दशावतारी, पालखी, नमन, भारूड, प्रवचनकार यांचाही सरकारी मानधन योजनेत समावेश करावा अशी मागणी केली.

कोरोनाकाळात कलाकारांना ३४ कोटींची मदत – अमित देशमुख
प्रतिवर्षी राज्यात २८ हजार सन्मानार्थी कलाकारांना मासिक मानधन मिळत आहे. याकरिता अंदाजे ९० कोटींची तरतूद राज्य सरकारकडून करण्यात येते. २०२१ साली काढलेल्या शासननिर्णयात मुंबई शहर, उपनगर, ठाणे व पुणे जिल्ह्यातील प्रत्येकी २००० आणि उर्वरित जिल्ह्यातील प्रत्येकी १५०० कलावंतांना अशा एकूण ५६ हजार कलावंतांना प्रत्येकी ५०००रुपय याप्रमाणे एकूण २८ कोटी व प्रयोगात्मक कला सादरीकरण करणार्‍यांना ८४७ समूह, पथक, फड यांना एकूण ६ कोटी एकरकमी मदत जाहीर करण्यात आली असल्याची माहिती सांस्कृतिक कार्यमंत्री अमित देशमुख यांनी दिली.

आमदारांची बैठक घेणार
स्थानिक कला सादर करणार्‍या कलाकारांची नोंद तसेच त्यांना आर्थिक सहकार्य करण्याबाबत सर्व आमदारांची संयुक्त बैठक घेऊ त्यांच्या सूचना घेण्यात येतील. व्यापक चर्चा करून त्यानुसार मार्गदर्शक तत्व ठरवली जातील व आर्थिक सहकार्याचा निर्णय घेतला जाईल. पावसाळी अधिवेशनापूर्वी हा विषय मार्गी लावला जाईल, असे आश्वासन मंत्री अमित देशमुख यांनी यावेळी दिले.