‘कोकणदीप’चा २४ वा वर्धापनदिन उत्साहात; २४ व्या वर्धापनदिनानिमित्त मान्यवरांचा सन्मान

मुंबई | प्रतिनिधी

‘कोकणदीप’ मासिकाच्या २४ व्या वर्धापनदिनानिमित्त आयोजित राज्यस्तरीय पुरस्कार वितरण सोहळा मुंबईतील दादर (पूर्व) येथील मुंबई मराठी ग्रंथसंग्रहालयाच्या सुरेंद्र गावस्कर सभागृहात उत्साहपूर्ण वातावरणात पार पडला. यावेळी विविध क्षेत्रांत उल्लेखनीय कार्य करणाऱ्या मान्यवरांचा सन्मान करण्यात आला.

दैनिक सामना या शिवसेनेच्या मुखपत्रावर पीएचडी करून डॉक्टरेट प्राप्त करणारे ज्येष्ठ संपादक डॉ. सुकृत खांडेकर, गिरणी कामगार संघर्ष समितीचे अध्यक्ष प्रवीण घाग आणि ज्येष्ठ साहित्यिक प्रा. बाळासाहेब तोरसकर यांना प्रतिष्ठेचा ‘कोकणदीप जीवन गौरव पुरस्कार’ प्रदान करण्यात आला.

कार्यक्रमाच्या अध्यक्षस्थानी दापोली विधानसभा मतदारसंघाचे शिवसेना संपर्क प्रमुख सुधीर कदम होते. नवनिर्वाचित जिल्हा परिषद सदस्या मिनाक्षी विनय शेडगे तसेच समाजभूषण पुरस्कार विजेते संतोष परब हे प्रमुख पाहुणे म्हणून उपस्थित होते.

यावेळी मुंबईचे सहाय्यक पोलीस आयुक्त रामचंद्र अशोक नागरगोजे, वन्यवाणी फाऊंडेशनचे संस्थापक मकरंद सावंत, कवी अशोक पुंडलिक उर्फ भाई नार्वेकर आणि ॲड. निलेश राऊत यांना ‘कोकणदीप गौरव पुरस्कार’ देऊन सन्मानित करण्यात आले.

तसेच सामाजिक कार्यकर्ते व युवा नेतृत्व प्रवीण लाड, कवी राजेंद्र चौधरी, प्रवीण महादेव घाटविलकर महाराज आणि ज्येष्ठ कवी विलास देवळेकर यांना ‘कोकण भूषण पुरस्कार’ प्रदान करण्यात आला. तर कुमार रोशन मोडकळे, पत्रकार सोनल महाडिक, उद्योजक चंद्रकांत पांढरे आणि सामाजिक कार्यकर्ते व पत्रकार शशिकांत सावंत यांना ‘कोकणरत्न पुरस्कार’ देऊन गौरविण्यात आले.

कार्यक्रमादरम्यान मान्यवरांच्या हस्ते ‘कोकणदीप’ मासिकाच्या नव्या अंकाचे तसेच प्रभू अग्रहारकर यांच्या पुस्तकाचे प्रकाशन करण्यात आले. या सोहळ्याचे आयोजन ‘कोकणदीप’ प्रकाशनाचे संस्थापक संपादक दिलीप शेडगे आणि उपसंपादक विद्याधर शेडगे यांनी केले होते.

या कार्यक्रमाला साहित्य, पत्रकारिता, सामाजिक आणि सांस्कृतिक क्षेत्रातील अनेक मान्यवर मोठ्या संख्येने उपस्थित होते. कार्यक्रमाचे सूत्रसंचालन प्रसाद महाडिक यांनी केले.