राज्यात २९ सप्टेंबरला एक हजार रोजगार मेळावे

मंत्री मंगल प्रभात लोढा यांचे युवकांना सहभागी होण्याचे आवाहन

‘लोकसंवाद’ अभियानातून रोजगाराच्या संधींसह विविध शासकीय योजनांची जनजागृती

मुंबई, दि. २१ : राज्यातील युवकांना रोजगाराच्या अधिकाधिक संधी उपलब्ध करून देण्यासाठी कौशल्य, रोजगार, उद्योजकता व नाविन्यता विभागाच्या वतीने २९ सप्टेंबर रोजी संपूर्ण महाराष्ट्रात एक हजार रोजगार मेळाव्यांचे आयोजन करण्यात आले आहे. ‘पंडित दीनदयाळ उपाध्याय रोजगार महाकुंभ महाराष्ट्र’ या उपक्रमांतर्गत आयोजित करण्यात येणाऱ्या या रोजगार मेळाव्यांमध्ये युवकांनी मोठ्या संख्येने सहभागी व्हावे, असे आवाहन कौशल्य विकास मंत्री मंगल प्रभात लोढा यांनी केले.

माहिती व जनसंपर्क विभागाच्या ‘लोकसंवाद–२०२६’ अभियानांतर्गत गणेशोत्सवाच्या माध्यमातून शासनाच्या विविध योजनांची माहिती नागरिकांपर्यंत पोहोचविण्यात येत आहे. याच उपक्रमाचा भाग म्हणून मुंबई शहर आणि मुंबई उपनगरातील विविध गणेश मंडळांमध्ये नागरिकांशी संवाद साधून रोजगार मेळावे तसेच उपलब्ध रोजगाराच्या संधींबाबत जनजागृती करण्यात आली.

मलबार हिल येथील मीनल क्रीडा मंडळाचे अध्यक्ष प्रशांत जाधव, उपाध्यक्ष निंगेश कोरे, राजीव मेहता, सागर पेंढारकर, आयेशा कुरेशी तसेच इतर पदाधिकारी, सदस्य आणि भक्तगण यावेळी उपस्थित होते.

मुंबई शहर जिल्ह्यात आयोजित करण्यात येणाऱ्या रोजगार मेळाव्यांची माहिती कौशल्य विकास अधिकारी विद्या शिंगे आणि समन्वयक अजय कांबळे यांनी दिली. तसेच माहिती व जनसंपर्क विभागाच्या विभागीय संपर्क अधिकारी संध्या गरवारे, श्रद्धा मेश्राम आणि अश्विनी पुजारी यांनी नागरिकांशी संवाद साधून रोजगार महाकुंभाची माहिती दिली.

राज्यातील युवकांना त्यांच्या शैक्षणिक पात्रता, कौशल्य आणि आवडीनुसार रोजगाराच्या संधी उपलब्ध करून देण्याच्या उद्देशाने हे रोजगार मेळावे आयोजित करण्यात आले आहेत. प्रत्येक तालुक्यात होणाऱ्या या मेळाव्यांमधून स्थानिक युवकांना विविध आस्थापना आणि उद्योगांमधील उपलब्ध रोजगाराच्या संधींची माहिती मिळणार आहे.

सामाजिक न्याय विभागाच्या योजनांची जनजागृती

‘लोकसंवाद’ अभियानाच्या माध्यमातून सामाजिक न्याय व विशेष सहाय्य विभागाच्या विविध कल्याणकारी योजनांचीही नागरिकांना माहिती देण्यात आली.

अनुसूचित जाती, नवबौद्ध, ज्येष्ठ नागरिक, दिव्यांग, तृतीयपंथीय तसेच इतर दुर्बल घटकांच्या सामाजिक, शैक्षणिक आणि आर्थिक उन्नतीसाठी विभागामार्फत विविध योजना राबविण्यात येतात.

मॅट्रिकोत्तर, सावित्रीबाई फुले आणि राजर्षी शाहू महाराज शिष्यवृत्तीच्या माध्यमातून विद्यार्थ्यांना शैक्षणिक सहाय्य दिले जाते. स्वाधार आणि शासकीय वसतिगृह योजनांद्वारे निवास व आवश्यक सुविधा उपलब्ध करून दिल्या जातात. रमाई आवास योजनेतून घरकुलासाठी आर्थिक सहाय्य, तर मुख्यमंत्री वयोश्री आणि संजय गांधी निराधार योजनेतून ज्येष्ठ नागरिक व निराधार व्यक्तींना आर्थिक आधार दिला जातो.

या योजनांच्या माध्यमातून शिक्षण, निवास, आर्थिक सहाय्य आणि सामाजिक सुरक्षेला बळ देत दुर्बल घटकांना सक्षम करण्यासाठी शासन प्रयत्नशील असल्याची माहिती नागरिकांना देण्यात आली.

महिला व बालकांच्या संरक्षण आणि सक्षमीकरणासाठी विविध योजना

महिला आणि बालकांचे संरक्षण, पोषण, शिक्षण, सक्षमीकरण आणि पुनर्वसन यासाठी महिला व बाल विकास विभागामार्फत विविध योजना आणि सेवा राबविण्यात येतात.

मुख्यमंत्री माझी लाडकी बहीण योजना, वन स्टॉप सेंटर, शक्ती सदन, आदर्श अंगणवाडी, बेबी केअर किट, प्रधानमंत्री मातृ वंदना योजना आणि पोषण अभियान यांसारख्या योजनांची माहिती नागरिकांना देण्यात आली.

अंगणवाडी सेवांच्या माध्यमातून बालकांना पूरक पोषण, आरोग्य तपासणी, लसीकरण आणि पूर्व-प्राथमिक शिक्षण दिले जाते. तसेच पालकांना पोषणविषयक मार्गदर्शनही करण्यात येते.

महिलांच्या संरक्षणासाठी महाराष्ट्र राज्य महिला आयोगामार्फत समुपदेशन आणि कायदेशीर मार्गदर्शन उपलब्ध करून दिले जाते. बालकांच्या हक्कांच्या संरक्षणासाठी प्राप्त तक्रारींवर आवश्यक कार्यवाही केली जाते. महिलांच्या आर्थिक सक्षमीकरणासाठी बचत गट, कौशल्यविकास आणि स्वयंरोजगाराला प्रोत्साहन देण्यात येत आहे.

यावेळी महिला हेल्पलाईन १५५२०९ आणि बाल हेल्पलाईन १०९८ या सुविधांचीही नागरिकांना माहिती देण्यात आली.

गणेशोत्सवाच्या काळात नागरिक मोठ्या संख्येने एकत्र येत असल्याने याच माध्यमातून शासनाच्या विविध योजनांची माहिती थेट नागरिकांपर्यंत पोहोचविण्याचा ‘लोकसंवाद’ उपक्रम राबविण्यात येत आहे. नागरिकांना त्यांच्या प्रश्नांबाबत संबंधित अधिकाऱ्यांकडून तत्काळ मार्गदर्शन मिळत असल्याने या उपक्रमाला चांगला प्रतिसाद मिळत आहे.