परिवहन विभागातील कथित भ्रष्टाचारप्रकरणी संबंधित अधिकाऱ्यांना सक्तीच्या रजेवर पाठविण्याची घोषणा

काँग्रेस विधिमंडळ नेते विजय वडेट्टीवार यांची कारवाईची मागणी; चौकशीनंतर कठोर कारवाईचे परिवहन मंत्र्यांचे आश्वासन

मुंबई, दि. ९ : विधानसभेत काँग्रेस विधिमंडळ पक्षाचे नेते विजय वडेट्टीवार यांनी परिवहन विभागातील कथित भ्रष्टाचार आणि गैरव्यवहाराचा मुद्दा उपस्थित करत संबंधित अधिकाऱ्यांवर तात्काळ कारवाई करण्याची जोरदार मागणी केली.

सभागृहात बोलताना वडेट्टीवार यांनी सांगितले की, परिवहन विभागातील काही अधिकाऱ्यांविरोधात चौकशी सुरू असतानाही त्यांच्याकडून पुन्हा गैरव्यवहार होत असल्याच्या गंभीर तक्रारी समोर येत आहेत. त्यामुळे संबंधित अधिकाऱ्यांची तात्काळ बदली करून त्यांना सक्तीच्या रजेवर पाठवावे, अशी मागणी त्यांनी केली.

यावर उत्तर देताना परिवहन मंत्र्यांनी सांगितले की, आरटीओ विभागातील कथित गैरव्यवहारप्रकरणी आर्थिक गुन्हे शाखेमार्फत चौकशी सुरू आहे. या प्रकरणात प्रादेशिक परिवहन अधिकारी रविंद्र भुयार, प्रादेशिक परिवहन अधिकारी योगेश मोरे आणि मोटार वाहन निरीक्षक आनंद मोड यांच्याविरोधातील आरोपांची गंभीर दखल घेण्यात आली आहे.

या चौकशीसाठी आयपीएस अधिकाऱ्यांची नियुक्ती करण्यात आली असून, आरोपांची निष्पक्ष चौकशी केली जाईल, असे मंत्र्यांनी स्पष्ट केले. तसेच, वडेट्टीवार यांनी उपस्थित केलेल्या मुद्द्यांची गंभीरता लक्षात घेऊन संबंधित अधिकाऱ्यांना तत्काळ सक्तीच्या रजेवर पाठविण्याची घोषणा त्यांनी विधानसभेत केली.

चौकशी पूर्ण झाल्यानंतर दोषी आढळणाऱ्या अधिकाऱ्यांवर नियमानुसार कठोर कारवाई करण्यात येईल, असेही परिवहन मंत्र्यांनी सभागृहात स्पष्ट केले.