जगभरातील मराठी समुदायाशी संवादासाठी ‘महाकनेक्ट’ उपक्रमाला गती

‘महाकनेक्ट’ संवादसेतू उपक्रमाद्वारे जागतिक मराठी मने जोडणार : मंत्री जयकुमार रावल

अमेरिकेतील मराठी समुदायाशी संवाद; जगभरातील मराठी माणूस महाराष्ट्राचा सांस्कृतिक राजदूत

मुंबई, दि. ३ : मुख्यमंत्री देवेंद्र फडणवीस यांच्या संकल्पनेतील ‘महाकनेक्ट’ या संवादसेतू उपक्रमाच्या माध्यमातून जगभरातील मराठी मने जोडून त्यांच्यातील सहसंबंध अधिक दृढ करण्यासाठी महाराष्ट्र शासनाने पुढाकार घेतला आहे, असे प्रतिपादन राजशिष्टाचार मंत्री जयकुमार रावल यांनी केले.

सह्याद्री राज्य अतिथीगृह येथे आयोजित जागतिक मराठी समुदायाशी दूरदृश्य प्रणालीद्वारे संवाद बैठकीत ते बोलत होते. या बैठकीला राजशिष्टाचार सचिव डॉ. राजेश गवांदे, विभागातील अधिकारी तसेच अमेरिकेतील विविध मराठी मंडळांचे पदाधिकारी ऑनलाइन उपस्थित होते.

जगभरातील मराठी माणूस महाराष्ट्राचा सांस्कृतिक राजदूत

मंत्री रावल म्हणाले की, आज भारत जगातील मोठी अर्थव्यवस्था म्हणून उदयास येत असून महाराष्ट्राचा त्यात मोठा वाटा आहे. मराठी समाजाने आपल्या कर्तृत्वाच्या जोरावर सातासमुद्रापार मराठी संस्कृती, परंपरा आणि ओळख पोहोचवली आहे. जगभरातील मराठी माणूस हा महाराष्ट्राचा सांस्कृतिक राजदूत असून राज्याच्या भविष्यातील विकासात तो महत्त्वाचा भागीदार आहे.

ते पुढे म्हणाले की, राजशिष्टाचार विभागाच्या माध्यमातून परकीय थेट गुंतवणूक, प्रवासी भारतीय व्यवहार आणि संपर्क या नवीन विषयांचा समावेश करण्यात आला आहे. या उपक्रमांतर्गत जागतिक मराठी समुदायाशी संवाद अधिक प्रभावीपणे साधण्याचा प्रयत्न केला जात आहे.

मराठी समाज संशोधन, तंत्रज्ञान, उद्योग आणि आंतरराष्ट्रीय कंपन्यांच्या नेतृत्वातही आघाडीवर असल्याचे त्यांनी नमूद केले. अमेरिकेतील मराठी मंडळांनी तेथे मराठी भाषा, साहित्य, संस्कृती आणि परंपरा जपण्यासाठी केलेले कार्य अतुलनीय असल्याचेही त्यांनी सांगितले.

‘महाकनेक्ट’ – डिजिटल संवादसेतू उपक्रम

पंतप्रधान नरेंद्र मोदी यांनी जागतिक भारतीय समुदायाशी मजबूत नाते निर्माण केले आहे. त्याच धर्तीवर मुख्यमंत्री देवेंद्र फडणवीस यांच्या संकल्पनेतून ‘महाकनेक्ट – महा NRI कनेक्ट’ हा संवादसेतू उपक्रम आकाराला आला आहे.

हा उपक्रम जगभरातील मराठी समुदायाला एका डिजिटल व्यासपीठावर एकत्र आणणार असून तो संवाद, विश्वास आणि सहकार्याचा सेतू ठरणार आहे. या माध्यमातून गुंतवणूक, उद्योग, व्यापार, पर्यटन, स्टार्टअप्स, सांस्कृतिक कार्यक्रम, युवकांचा सहभाग आणि शासनाशी थेट संवाद अशा विविध संधी उपलब्ध होणार असल्याचे मंत्री रावल यांनी स्पष्ट केले.

सूचना आणि सहकार्याचे आवाहन

जागतिक मराठी समुदायाकडून विविध क्षेत्रातील ज्ञान, अनुभव आणि सहकार्य वाढवण्यासाठी सूचना अपेक्षित असल्याचेही त्यांनी सांगितले.

अमेरिकेतील मराठी मंडळांचा सहभाग

या ऑनलाइन संवाद कार्यक्रमात बृहन्महाराष्ट्र मंडळाचे प्रसाद पानवलकर, विजय चौथाईवाले, आनंद गानू तसेच गर्जे मराठी ग्लोबल, मराठी विश्व, महाराष्ट्र मंडळ (शिकागो), ऑस्टिन मराठी मंडळ, नॉर्थ अमेरिका फिल्म असोसिएशन, कनेक्टिकट महाराष्ट्र मंडळ, फिलाडेल्फिया, लास व्हेगास, न्यू इंग्लंड, पिट्सबर्ग आदी विविध मराठी मंडळांचे पदाधिकारी सहभागी झाले होते.