लॉटरी विक्रेत्यांच्या प्रश्नांवर अजित पवार यांची ठाम भूमिका
लॉटरी विक्रेत्यांच्या प्रश्नांवर अजित पवार यांची ठाम भूमिका
मुंबई / रमेश औताडे
महाराष्ट्र राज्य लॉटरी विक्रेत्यांच्या अडचणींबाबत ठोस निर्णय घेणारे आणि या घटकाला न्याय देणारे नेतृत्व म्हणून उपमुख्यमंत्री अजितदादा पवार यांची ओळख होती, अशा शब्दांत राज्यातील लॉटरी विक्रेत्यांनी त्यांना भावपूर्ण श्रद्धांजली अर्पण केली.
महाराष्ट्र राज्य लॉटरी विक्रेता संघटनेचे संस्थापक अध्यक्ष तथा विलास सातार्डेकर यांनी अजित पवार यांच्या कार्याची आठवण करून देताना सांगितले की, राज्यातील लाखो लॉटरी विक्रेत्यांच्या उपजीविकेचा प्रश्न निर्माण झाला असताना अजित पवार यांनी या विषयाकडे गांभीर्याने लक्ष दिले. विक्रेत्यांचे प्रतिनिधी, संघटना आणि संबंधित घटकांशी चर्चा करून त्यांनी निर्णयप्रक्रियेला दिशा दिली.
लॉटरी व्यवसायावर आलेल्या संकटाच्या काळात शासन स्तरावर योग्य भूमिका घेऊन रोजगार टिकवण्यासाठी केलेले प्रयत्न आजही विसरता येणार नाहीत, असे त्यांनी नमूद केले. सर्वसामान्य, गरीब आणि कष्टकरी वर्गाच्या हिताचा विचार करून घेतलेले निर्णय हीच अजित पवार यांची खरी ओळख होती, असेही त्यांनी सांगितले.
अजित पवार यांच्या निधनाने राज्यातील लॉटरी विक्रेते, कामगार आणि सर्वसामान्य जनतेने एक संवेदनशील आणि कणखर नेतृत्व गमावले आहे. त्यांच्या आठवणी कायम प्रेरणादायी राहतील, अशा शब्दांत विलास सातार्डेकर यांनी श्रद्धांजली व्यक्त केली.
