पालघरमध्ये मुसळधार पावसाचा इशारा; उद्या सर्व शाळा, महाविद्यालये बंद

पालघर जिल्ह्यात ८ जुलै रोजी सर्व शाळा-महाविद्यालयांना सुट्टी जाहीर

पालघर, दि. ७ : भारतीय हवामान विभागाने पालघर जिल्ह्यासाठी अतिवृष्टीचा इशारा दिल्याने आणि गेल्या काही दिवसांपासून सुरू असलेल्या मुसळधार पावसाच्या पार्श्वभूमीवर जिल्हा प्रशासनाने विद्यार्थ्यांच्या सुरक्षिततेच्या दृष्टीने महत्त्वाचा निर्णय घेतला आहे.

जिल्हाधिकारी डॉ. इंदू राणी जाखड यांनी बुधवार, ८ जुलै २०२६ रोजी पालघर जिल्ह्यातील सर्व अंगणवाड्या, शासकीय व खासगी प्राथमिक-माध्यमिक शाळा, जिल्हा परिषद व नगरपालिका शाळा, अनुदानित व विनाअनुदानित शाळा, आश्रमशाळा तसेच सर्व महाविद्यालये आणि औद्योगिक प्रशिक्षण संस्था (ITI) यांना सुट्टी जाहीर केली आहे.

जिल्हाधिकाऱ्यांनी जारी केलेल्या आदेशानुसार, भारतीय हवामान विभागाने ७ जुलै रोजी पालघर जिल्ह्यात काही ठिकाणी मुसळधार पावसाचा (Heavy Rainfall at Isolated Places) इशारा दिला आहे. तसेच ४ ते ७ जुलैदरम्यान झालेल्या अतिवृष्टीमुळे जिल्ह्यातील अनेक भागांत पाणी साचले असून परिस्थिती सामान्य होण्यासाठी काही वेळ लागण्याची शक्यता आहे.

विद्यार्थ्यांची सुरक्षितता लक्षात घेऊन हा निर्णय घेण्यात आला असल्याचे जिल्हा प्रशासनाने स्पष्ट केले आहे.

हा आदेश आपत्ती व्यवस्थापन अधिनियम, २००५ तसेच शालेय शिक्षण विभागाच्या शासन परिपत्रकांमधील अधिकारांचा वापर करून जारी करण्यात आला आहे. संबंधित सर्व यंत्रणांना आदेशाची तातडीने अंमलबजावणी करण्याचे निर्देश देण्यात आले आहेत.