आरेत शासकीय योजना मार्गदर्शन शिबीरास उत्स्फूर्त प्रतिसाद

मुंबई : सामान्य नागरिकांना शासनाच्या विविध योजनांची माहिती मिळावी आणि त्याचा लाभ मिळावा, या उद्देशाने नवक्षितिज चॅरिटेबल ट्रस्टच्या वतीने एकदिवसीय शासकीय योजना मार्गदर्शन शिबीर आयोजित करण्यात आले. हे शिबीर काल (२१ सप्टेंबर) रोजी गोरेगाव पूर्व, आरे युनिट क्र. ६, श्री स्वामी समर्थ मठ येथे दुपारी ३.३० ते ६.३० या वेळेत पार पडले. या शिबिराला आरे परिसरातील नागरिक, महिलावर्ग, युवक आणि पश्चिम उपनगरातील अनेक रहिवाशांनी मोठ्या संख्येने उपस्थित राहून उत्स्फूर्त प्रतिसाद दिला.

इरेश चपलवार (तहसीलदार, बोरिवली) यांनी – दाखले मिळवण्याची प्रक्रिया व आवश्यक कागदपत्रांबाबत सविस्तर माहिती दिली. प्रदीप सावंत (प्रकल्प अधिकारी, महाराष्ट्र उद्योजकता विकास केंद्र – एमसीईडी) यांनी महिला आणि युवकांसाठी स्वयंरोजगार संधी, कौशल्य विकास योजना आणि मुख्यमंत्री रोजगार निर्मिती कार्यक्रमाविषयी मार्गदर्शन केले. अतुल सावे (तहसीलदार, संजय गांधी निराधार योजना) यांनी संजय गांधी निराधार योजनेतून मिळणारे लाभ, पात्रता निकष आणि अर्ज प्रक्रिया यावर सविस्तर माहिती दिली. धनंजय पवार, विनोद साडविलकर व कृष्णा कदम (रुग्णमित्र, वैद्यकीय मदत कक्ष) यांनी धर्मादाय रुग्णालयांतर्गत मिळणाऱ्या मोफत व सवलतीच्या वैद्यकीय सेवा, तसेच आरोग्य विभागाच्या योजनांची माहिती दिली.

आयोजक सुनील कुमरे यांनी कार्यक्रमाचे आयोजन यशस्वीरीत्या पार पाडल्याबद्दल समाधान व्यक्त करत सांगितले की,या शिबिरामध्ये नागरिकांचा मोठा सहभाग हा प्रेरणादायक असून अशा शिबिरांचे आयोजन पुढेही सातत्याने करण्यात येईल.संजय गांधी निराधार योजनेअंतर्गत सध्या असलेली २१,००० ची उत्पन्न मर्यादा अत्यल्प आहे. ती वाढवून किमान ६०,००० करणे अत्यावश्यक आहे, जेणेकरून खरोखर गरजू नागरिकांना या योजनेचा लाभ मिळू शकेल. सर्व मान्यवरांचे शाल आणि तुळशीचे रोप देऊन सन्मानपूर्वक स्वागत करण्यात आले. कार्यक्रमानंतर नागरिकांनी आपले प्रश्न उपस्थित मान्यवरांना विचारले. सर्व मान्यवरांनी प्रत्येक शंकांचे सविस्तर उत्तर देत नागरिकांचे समाधान केले.कार्यक्रमाच्या यशस्वी आयोजनाबद्दल सहभागी नागरिकांनी आणि मान्यवरांनी कुमरे यांचे विशेष कौतुक केले.