दि. ३ जून २०२६
आमदार डॉ. नीलम गोऱ्हे यांच्या सूचनांनुसार सीआयडीची तातडीची कारवाई; पुणे विषारी दारू प्रकरणाच्या तपासाला गती
पुणे, दि. ३ : दापोडी आणि हडपसर परिसरातील विषारी हातभट्टी दारू प्रकरणाची शिवसेना नेत्या व विधान परिषदेच्या उपसभापती आमदार डॉ. नीलम गोऱ्हे यांनी सुरुवातीपासूनच गंभीर दखल घेतली असून, त्यांच्या सूचनांनुसार गुन्हे अन्वेषण विभागाने (सीआयडी) तपासाला अधिक गती दिली आहे. डॉ. गोऱ्हे यांनी मंगळवार, दि. २ जून रोजी सीआयडी, पुणे कार्यालयाला भेट देत तपासाचा सविस्तर आढावा घेतला होता. यावेळी त्यांनी तपास व्यापक, सखोल आणि परिणामकारक पद्धतीने करण्याबाबत महत्त्वपूर्ण सूचना केल्या होत्या.
सीआयडी, पुणे यांनी प्रसिद्ध केलेल्या पत्रकानुसार, दापोडी व हडपसर येथे विषारी हातभट्टी दारू सेवनामुळे झालेल्या मृत्यू प्रकरणातील दोन्ही गुन्ह्यांचा तपास सीआयडीकडे वर्ग करण्यात आला असून, तपासासाठी १० विशेष पथकांची नियुक्ती करण्यात आली आहे. दापोडी प्रकरणातील सहाही आरोपींना अटक करण्यात आली असून, त्यांची पोलीस कोठडी मिळवून पुढील चौकशी सुरू आहे.
राज्य उत्पादन शुल्क विभागाच्या कारवाईत आकाश जाधव, इरफान निसार कुरेशी आणि आर्यन संजय धोत्रे यांना अटक करण्यात आली आहे. या आरोपींना सीआयडी तपासातही अटक करून त्यांच्याकडून चौकशी सुरू आहे. तसेच अन्न व औषध प्रशासनाने ठाणे येथे दाखल केलेल्या संबंधित गुन्ह्यातील आरोपींनाही तपासाच्या कक्षेत आणण्याची प्रक्रिया सुरू करण्यात आली आहे.
तपासादरम्यान विविध घटनास्थळांवरील सीसीटीव्ही फुटेज, दारूचे नमुने आणि अन्य महत्त्वाचे पुरावे जप्त करून ते न्यायवैज्ञानिक प्रयोगशाळेकडे पाठविण्यात आले आहेत. आरोपींकडून जप्त करण्यात आलेल्या मोबाईल फोनचे तांत्रिक विश्लेषण सुरू असून, मेथेनॉल पुरवठा साखळीतील दोन महत्त्वाचे संशयित निष्पन्न झाल्याची माहिती सीआयडीने दिली आहे. त्यांच्याकडून अधिक माहिती व पुरावे संकलित करण्याचे काम सुरू आहे.
या प्रकरणाचा तपास पोलीस उपअधीक्षक शामराव काळे (८२३७२२९२०८) आणि सचिन चव्हाण (९०११३३४५८०) यांच्या नेतृत्वाखाली सुरू असून, नागरिकांनी या प्रकरणासंदर्भात कोणतीही माहिती असल्यास तपास अधिकाऱ्यांशी संपर्क साधावा, असे आवाहन करण्यात आले आहे.
चौकट :
“पुणे विषारी दारू प्रकरणात सीआयडी अधिकाऱ्यांनी अत्यंत तत्परतेने कारवाई करत माझ्या सूचनांची दखल घेत अंमलबजावणी सुरू केली आहे, याबद्दल मी त्यांचे अभिनंदन करते. या प्रकरणाचा तपास सर्व अंगांनी, निष्पक्ष आणि पारदर्शक पद्धतीने व्हावा, ही जनतेची अपेक्षा आहे. सीआयडीबाबत नागरिकांच्या मनात असलेला विश्वास आणि आदर अधिक दृढ करत दोषींवर कठोर कारवाई होईल, असा मला विश्वास आहे,” असे आमदार डॉ. नीलम गोऱ्हे यांनी सांगितले.
