मुंबई – डिसेंबर महिन्यात ३ ते ४ दिवस राज्यातील अनेक जिल्ह्यांमध्ये जोरदार पावसाने हजेरी लावली होती. तर २७ डिसेंबर रोजी राज्यातील अनेक जिल्ह्यांमध्ये अवकाळी पावसासह गारपीट ही झाली. यातच या अवकाळी पाऊस आणि गारपीटीने राज्यातील अनेक जिल्ह्यांमध्ये थंडी मोठ्या प्रमाणात वाढवली होती. अश्यात पुन्हा एकदा राज्यात पाऊस पडणार असल्याची माहिती हवामान विभागाने दिली आहे.
राज्यात मागील काही दिवसांपासून पारा घसरल्यामुळे हुडहुडी वाढली आहे.यातच आता पाऊस हवामान बिघडवण्याची चिन्ह आहेत. राज्यातील अनेक जिल्ह्यांमध्ये मुसळधार पाऊस पडणार असल्याचा अंदाज हवामान विभागाने दिला आहे. तर हवामान विभागाने दिलेल्या अंदाजानुसार राज्यातील उत्तर महाराष्ट्र आणि विदर्भात उद्यापासून म्हणजेच ६ जानेवारीपासून मुसळधार पाऊस पडणार आहे.
तसेच हवामान विभागाने दिलेल्या अंदाजानुसार उद्या म्हणजेच गुरुवारी आणि शुक्रवारी उत्तर महाराष्ट्र, नाशिक, खान्देश तसेच विदर्भात ढगाळ वातावरणासह तुरळक ठिकाणी पावसाची शक्यता आहे. मात्र पडणाऱ्या या अवकाळी पावसामुळे शेतकरी हवालदिल झाला आहे. दिवाळीच्या पूर्वी पडलेल्या पावसामुळे शेतकऱ्यांच्या हाताला आलेले पीक पावसाच्या पाण्यात वाहून गेले होते. त्यामुळे शेतकऱ्यांचे मोठे नुकसान झाले होते.अश्यात आता पुन्हा पाऊस पडणार असल्याने शेतकरी हवालदिल झाला आहे.
