बोरीवली पूर्व येथे आजपासून मालवणी महोत्सव ; कोकणी संस्कृती आणि खाद्यपदार्थांची मेजवानी.
मुंबई : मागाठाणे मित्र मंडळ आणि शिवसेना शाखा क्रमांक १४ तसेच १२ च्या संयुक्त विद्यमाने उद्या, रविवार, २६ ऑक्टोबर २०२५ पासून बोरीवली पूर्व येथील जय महाराष्ट्र नगर येथील कै. अनंतराव भोसले मैदानावर मालवणी महोत्सवाचे आयोजन करण्यात आले आहे. परंपरेप्रमाणे सिंधुदुर्ग जिल्ह्यातील मालवण तालुक्यातील पेंडूर येथील देव वेताळ मंदिराच्या प्रतिकृती आणि बालनगरी व बाजारपेठेचे महाआरती तसेच पारंपारिक गाऱ्हाणे घालून उद्घाटन करण्यात येणार आहे. शिवसेना उपनेते विनोद घोसाळकर, उपनेते विश्वनाथ नेरुरकर, माजी आमदार विलास पोतनीस, विभाग प्रमुख उदेश पाटेकर, महिला विभाग संघटक शुभदा शिंदे, विविध लोकप्रतिनिधी या मालवणी महोत्सवास भेट देऊन मार्गदर्शन करणार आहेत. या मालवणी महोत्सवाचे यंदाचे २८ वे वर्ष असून रविवार, २ नोव्हेंबर २०२५ पर्यंत कोकणी संस्कृती आणि खाद्यपदार्थांची मेजवानी उपलब्ध होणार आहे. रोज सायंकाळी ७ वाजता देव वेताळाची वाजंत्री तरंगासह पालखी आणि रात्री ८ वाजता दशावतार नाट्यप्रयोग सादर करण्यात येणार आहेत, अशी माहिती उत्सव प्रमुख आणि मागाठाणे मित्र मंडळाचे अध्यक्ष नंदकुमार मोरे आणि सचिव वसंत सावंत यांनी दिली.
