मालाड (पूर्व) येथे नवीन शिधावाटप कार्यालयासाठी जागा मंजूर करावी; आमदार सुनील प्रभू यांची विधानसभेत मागणी
मुंबई, दि. (प्रतिनिधी) :
मालाड (पूर्व) येथे मंजूर करण्यात आलेल्या नवीन शिधावाटप कार्यालयासाठी तातडीने जागा उपलब्ध करून द्यावी, अशी मागणी शिवसेना (उद्धव बाळासाहेब ठाकरे) पक्षाचे आमदार तथा मुख्य प्रतोद सुनील प्रभू यांनी बुधवारी विधानसभेत औचित्याच्या मुद्द्याद्वारे केली.
विधानसभा सभागृहात बोलताना प्रभू यांनी सांगितले की, शासनाच्या आदेशानुसार मालाड (पूर्व) येथे नवीन शिधावाटप कार्यालय सुरू करण्याचा निर्णय घेण्यात आला आहे. यासाठी जागा उपलब्ध करून देण्याबाबत संबंधित विभागाच्या अधिकाऱ्यांना तसेच मुंबई उपनगर जिल्हा प्रशासनाला वारंवार कळविण्यात आले. मात्र, अद्याप जागेचा प्रस्ताव तयार करून शासनाकडे मंजुरीसाठी सादर करण्यात आलेला नाही. जिल्हाधिकाऱ्यांकडून कोणतीही ठोस कार्यवाही न झाल्याने या कार्यालयाच्या स्थापनेला विलंब होत आहे.
या विलंबामुळे मालाड परिसरातील शिधापत्रिकाधारक नागरिकांना मोठ्या गैरसोयीला सामोरे जावे लागत असल्याचे त्यांनी निदर्शनास आणून दिले. मतदारसंघनिहाय शिधावाटप कार्यालयांची पुनर्रचना करण्यात आली असून कर्मचारी व नागरिकांच्या सोयीसाठी मध्यवर्ती ठिकाणी कार्यालय सुरू करण्याचे शासनाने निर्देश दिले आहेत. शासनाच्या आदेशानुसार १ जुलै २०२६ पर्यंत नवीन शिधावाटप कार्यालय कार्यान्वित करणे शक्य असल्याचे नमूद करण्यात आले आहे.
यासंदर्भात पी/पूर्व विभागातील मुंबई महापालिकेच्या राखीव जागांपैकी योग्य व मध्यवर्ती जागा निश्चित करण्यासाठी तसेच प्रस्तावाला मंजुरी देण्यासाठी मुंबई महानगरपालिकेच्या आयुक्तांना ११ जून २०२६ रोजी लेखी निवेदन देण्यात आले होते. मात्र, अद्याप त्यावर कोणतीही दखल घेण्यात आलेली नाही, अशी खंत प्रभू यांनी व्यक्त केली.
मालाड (पूर्व) परिसरातील नागरिकांच्या हितासाठी योग्य जागा निश्चित करून नवीन शिधावाटप कार्यालय सुरू करण्यासाठी शासनाने तातडीने कार्यवाही करावी, अशी मागणी आमदार सुनील प्रभू यांनी औचित्याच्या मुद्द्याद्वारे केली.
