काळ्या फिती लावून ‘धडक’चा आरे पोलीस ठाण्यावर निषेध; दोषींवर कारवाई होईपर्यंत आंदोलन सुरूच – कामगार नेते अभिजीत राणे
मुंबई, दि. (विशेष प्रतिनिधी):
आरे कॉलनीतील रॉयल गोल्ड स्टुडिओमध्ये चित्रिकरणादरम्यान विजेचा धक्का लागून मृत्यू झालेल्या बॅकस्टेज कामगार चंद्रधारी किशोर यादव यांच्या मृत्यूप्रकरणी दोषींवर निष्काळजीपणाचा गुन्हा दाखल करण्याच्या मागणीसाठी धडक कामगार युनियनने गुरुवारी आरे पोलीस ठाण्यासमोर काळ्या फिती बांधून लोकशाही मार्गाने निषेध आंदोलन केले. मृत कामगाराच्या कुटुंबीयांना न्याय मिळेपर्यंत हा लढा सुरूच राहील, असा ठाम इशारा धडक कामगार युनियनचे संस्थापक महासचिव तथा कामगार नेते अभिजीत राणे यांनी यावेळी दिला.
अभिजीत राणे यांच्या नेतृत्वाखाली झालेल्या या आंदोलनात युनियनचे पदाधिकारी आणि कार्यकर्त्यांनी हाताला काळ्या फिती बांधून निषेध नोंदविला.
आंदोलनानंतर धडक कामगार युनियनच्या शिष्टमंडळाने आरे पोलीस ठाण्याचे वरिष्ठ पोलीस निरीक्षक रवींद्र पाटील यांची भेट घेऊन सविस्तर निवेदन सादर केले. या बैठकीला संबंधित प्रकरणाचे तपास अधिकारी अंधारे हेही उपस्थित होते. शिष्टमंडळाने या प्रकरणाचा तपास तातडीने पूर्ण करून संबंधित प्रॉडक्शन हाऊस, स्टुडिओ व्यवस्थापन आणि जबाबदार व्यक्तींविरुद्ध त्वरित गुन्हा दाखल करण्याची मागणी केली.
युनियनने आपल्या निवेदनात म्हटले आहे की, चंद्रधारी यादव यांचा मृत्यू हा केवळ अपघात नसून गंभीर निष्काळजीपणाचा परिणाम असल्याची दाट शक्यता आहे. त्यामुळे या घटनेची सर्वंकष आणि निष्पक्ष चौकशी होणे आवश्यक आहे. दुर्घटनेच्या वेळी घटनास्थळी रुग्णवाहिका उपलब्ध नव्हती, प्रथमोपचाराची पुरेशी व्यवस्था नव्हती आणि विद्युत सुरक्षेच्या नियमांचे पालन करण्यात आले होते का, याबाबत गंभीर प्रश्न उपस्थित होत आहेत. तसेच जनरेटरद्वारे करण्यात आलेल्या वीजपुरवठ्याची तांत्रिक तपासणी, घटनास्थळावरील सीसीटीव्ही फुटेज, प्रत्यक्षदर्शींचे जबाब आणि अन्य महत्त्वाचे पुरावे तपासात तातडीने समाविष्ट करण्याची मागणीही करण्यात आली.
यावेळी अभिजीत राणे म्हणाले, “एका कष्टकरी कामगाराचा जीव जाऊन अनेक दिवस उलटले, तरी अद्याप जबाबदारांवर गुन्हा दाखल झालेला नाही. हा केवळ एका कामगाराच्या मृत्यूचा प्रश्न नसून संपूर्ण चित्रपटसृष्टीतील कामगारांच्या सुरक्षिततेशी संबंधित गंभीर विषय आहे. कायद्यापुढे सर्व समान आहेत. कोणतेही प्रॉडक्शन हाऊस किंवा प्रभावशाली व्यक्ती कायद्यापेक्षा मोठी असू शकत नाही. निष्पक्ष तपास करून दोषींवर तातडीने कारवाई झालीच पाहिजे. अन्यथा धडक कामगार युनियन हे आंदोलन अधिक तीव्र करेल.”
भविष्यात अशा दुर्घटनांची पुनरावृत्ती टाळण्यासाठी मुंबईतील सर्व चित्रपट स्टुडिओंचे विशेष सुरक्षा लेखापरीक्षण (सेफ्टी ऑडिट) करण्यात यावे, तसेच कामगारांसाठी आपत्कालीन वैद्यकीय सुविधा, प्रथमोपचार व्यवस्था आणि विद्युत सुरक्षेच्या नियमांची सक्तीने अंमलबजावणी करण्यात यावी, अशी मागणीही युनियनने केली.
या आंदोलनात धडक कामगार युनियनचे पदाधिकारी नारायण पाणीकर, जॉनी वाइके, किरण मोरे, बी. के. पांडेय, विशाल मोरे, साहेबराव जाधव, फरीद शेख, धर्मेंद्र पाल, नारायण राठोड, बबन आगडे, रवी बनसोडे, राजकुमार सरोज, अनिल यादव, अभिजीत भोईटे, लोकेश राणे, गुंजन जयस्वाल, तुषार कथेरेचा, वाहिद शेख, प्रकाश पवार, नितीन खेतले, सत्यविजय सावंत, मोहन जाधव, अनिकेत गोपाळे, आशुतोष सिंग, आनंदी आर्या, गुरुविंदर सिंह नागी, अभिषेक चव्हाण, मयूर सोनवणे, अविनाश खंडारे, आदिल भाटी आदी पदाधिकारी व कार्यकर्ते मोठ्या संख्येने उपस्थित होते.
दरम्यान, धडक कामगार युनियनने आंदोलनाच्या पुढील टप्प्यांचीही घोषणा केली आहे. त्यानुसार ३ जुलै रोजी रॉयल गोल्ड स्टुडिओसमोर, तर ४ जुलै रोजी संजय लीला भन्साळी प्रॉडक्शन कार्यालयासमोर आंदोलन करण्यात येणार आहे. मृत कामगाराला न्याय मिळेपर्यंत हा लढा अखंड सुरू राहील, असा निर्धार यावेळी व्यक्त करण्यात आला.
