मुंबई–पुणे कनेक्टिंग लिंक परिसरात दरड कोसळल्याने खळबळ; मंत्री घटनास्थळी दाखल
कनेक्टिंग लिंक एंट्री पॉईंटजवळ दरड कोसळल्यानंतर सार्वजनिक बांधकाम मंत्र्यांची पाहणी
मुंबई, दि. ६ जुलै : मुंबई–पुणे कनेक्टिंग लिंक प्रकल्पाच्या प्रवेशबिंदूजवळ दरड कोसळल्याच्या घटनेनंतर सार्वजनिक बांधकाम मंत्री शिवेंद्रसिंहराजे भोसले यांनी आज घटनास्थळी भेट देऊन परिस्थितीची प्रत्यक्ष पाहणी केली. यावेळी एमएसआरडीसीचे वरिष्ठ अधिकारी, पोलीस प्रशासन तसेच संबंधित विभागाचे अधिकारी उपस्थित होते.
घटनास्थळी पाहणीनंतर मंत्री भोसले यांनी सांगितले की, मागील काही दिवसांपासून सुरू असलेल्या मुसळधार पावसामुळे पाण्याच्या प्रवाहात बदल होऊन मोठ्या प्रमाणात दगड आणि माती खाली आली. या घटनेत कनेक्टिंग लिंकच्या बोगद्याला कोणतीही हानी झालेली नाही. मात्र, एंट्री पॉईंट परिसरातील शोसाठी असलेला स्लॅब आणि संरक्षण भिंतीचा काही भाग कोसळल्याची घटना घडली आहे.
सध्या सुरू असलेल्या मुसळधार पावसामुळे आणि दाट धुक्यामुळे डोंगर माथ्यावरील परिस्थितीचे अचूक निरीक्षण करणे कठीण झाले आहे. पाऊस कमी झाल्यानंतर तज्ज्ञांकडून सविस्तर तांत्रिक पाहणी करण्यात येईल. पाण्याच्या प्रवाहात झालेला बदल आणि भविष्यात अशा घटना टाळण्यासाठी आवश्यक उपाययोजनांबाबतचा निर्णय त्यानंतर घेतला जाईल, असे त्यांनी स्पष्ट केले.
दरम्यान, रस्त्यावर पडलेला मलबा आणि कोसळलेला स्लॅब हटविण्याचे काम युद्धपातळीवर सुरू असून ते तातडीने पूर्ण करण्याच्या सूचना संबंधित यंत्रणांना देण्यात आल्या आहेत.
रस्ता वाहतुकीसाठी खुला करायचा की नाही, याबाबत अंतिम निर्णय पोलीस प्रशासन आणि एमएसआरडीसी यांच्या संयुक्त पाहणी व सुरक्षा मूल्यमापनानंतर घेतला जाईल. नागरिकांच्या सुरक्षिततेला सर्वोच्च प्राधान्य देण्यात येईल, असेही मंत्री शिवेंद्रसिंहराजे भोसले यांनी सांगितले.
