जिद्दीचा विजय: पाय फ्रॅक्चर असतानाही केली ८५.७ किमी मॅरेथॉन पूर्ण..

हृदयरोगतज्ज्ञ डॉ. पंकज पाटील यांचा विक्रम; कॉम्रेड्स अल्ट्रा मॅरेथॉनची फिनिश लाईन पाय फ्रॅक्चर असतानाही पार

मुंबई, दि. (प्रतिनिधी) : दक्षिण आफ्रिकेतील डर्बन येथे नुकत्याच पार पडलेल्या ‘हार मानू नका’ या संकल्पनेवर आधारित प्रतिष्ठित कॉम्रेड्स अल्ट्रा मॅरेथॉन २०२६ मध्ये ठाण्याचे प्रसिद्ध हृदयरोगतज्ज्ञ डॉ. पंकज पाटील यांनी उल्लेखनीय कामगिरी करत सर्वांचे लक्ष वेधले. पायाला फ्रॅक्चर असतानाही त्यांनी अत्यंत खडतर मानली जाणारी ८५.७ किलोमीटरची शर्यत पूर्ण करत पिटरमॅरिट्झबर्ग येथील फिनिश लाईन यशस्वीरित्या पार केली.

डॉ. पाटील यांनी एक दिवस ही अल्ट्रा मॅरेथॉन पूर्ण करण्याचे स्वप्न पाहिले होते. त्या दिशेने त्यांनी वैद्यकीय जबाबदाऱ्या सांभाळत नियमित आणि शिस्तबद्ध सराव सुरू ठेवला. रोज पहाटे धावणे, आठवड्याला लाँग रन, तसेच डोंगराळ भागातील प्रशिक्षण अशा कठोर सरावातून त्यांनी स्वतःला तयार केले होते.

मात्र ऑक्टोबर २०२५ मध्ये त्यांना सॅक्रल अ‍ॅलार्म फ्रॅक्चर झाल्याने त्यांच्या तयारीला मोठा धक्का बसला. या काळात शारीरिक तसेच मानसिक आव्हानांचा सामना करताना त्यांच्यासाठी हा टप्पा अत्यंत कठीण ठरला. तरीही डॉ. योगेश सातव-पाटील यांचे मार्गदर्शन, पत्नी डॉ. विद्या पाटील यांचा भक्कम पाठिंबा आणि कुटुंबीयांची साथ यांच्या जोरावर त्यांनी पुन्हा निर्धार कायम ठेवला.

जखमा आणि वेदना यांवर मात करत डर्बन येथून सुरू झालेली ही ८५.७ किलोमीटरची अल्ट्रा मॅरेथॉन डॉ. पंकज पाटील यांनी ११ तास २१ मिनिटे ५८ सेकंदांत पूर्ण केली. “हार मानू नका” हा संदेश प्रत्यक्षात जगत त्यांनी आपल्या जिद्दीचे आणि इच्छाशक्तीचे उत्तम उदाहरण सादर केले.

“फ्रॅक्चरपासून फिनिश लाईनपर्यंतचा प्रवास हा इच्छाशक्तीच्या विजयाचा अनुभव आहे,” असे डॉ. पाटील यांनी सांगितले. त्यांच्या या यशात पत्नी डॉ. विद्या आणि कन्या त्रिषा व श्रावी यांचा मोठा वाटा असल्याचेही त्यांनी नमूद केले.

त्यांच्या या उल्लेखनीय कामगिरीचे वैद्यकीय आणि क्रीडा क्षेत्रातून सर्वत्र कौतुक होत असून ही कामगिरी अनेकांसाठी प्रेरणादायी ठरत आहे.