चित्रनिर्मितीच्या नव्या युगाची नांदी; चित्रनगरीत AI कार्यशाळेला प्रतिसाद
चित्रनगरीत ‘कृत्रिम बुद्धिमत्ता आधारित चित्रनिर्मिती’ कार्यशाळेला उत्स्फूर्त प्रतिसाद
मुंबई, प्रतिनिधी : चित्रपट निर्मितीच्या क्षेत्रात कृत्रिम बुद्धिमत्तेचा (AI) वाढता वापर लक्षात घेऊन महाराष्ट्र चित्रपट, रंगभूमी आणि सांस्कृतिक विकास महामंडळाच्या वतीने ‘सृजन : संवाद कौशल्य’ उपक्रमांतर्गत ‘कृत्रिम बुद्धिमत्ता आधारित चित्रनिर्मिती’ या विषयावर एकदिवसीय कार्यशाळेचे आयोजन करण्यात आले. चित्रनगरीतील चित्रांगण सभागृहात झालेल्या या कार्यशाळेला ५६ प्रशिक्षणार्थींचा उत्स्फूर्त प्रतिसाद मिळाला.
महामंडळाच्या व्यवस्थापकीय संचालिका स्वाती म्हसे पाटील यांच्या मार्गदर्शनाखाली आयोजित या कार्यशाळेत चित्रपट निर्मितीच्या पूर्वतयारीपासून निर्मिती, निर्मितीनंतरची प्रक्रिया तसेच प्रसार आणि विपणनापर्यंतच्या विविध टप्प्यांमध्ये कृत्रिम बुद्धिमत्तेचा प्रभावी वापर कसा करता येईल, याचे व्यावहारिक प्रशिक्षण देण्यात आले. पटकथा लेखन, दिग्दर्शन, छायांकन, दृश्य परिणाम, संकलन आणि डिजिटल आशयनिर्मिती या क्षेत्रांतील AI च्या वापराबाबत प्रात्यक्षिकांसह मार्गदर्शन करण्यात आले.
तेजस प्रभा विजय देऊस्कर (AI आधारित चित्रपट निर्मिती तज्ज्ञ), जगजीत सिंग (AI तंत्रज्ञान तज्ज्ञ) आणि प्रशांत ठाकूर (AI आधारित चित्रपट निर्माते) यांनी मार्गदर्शक म्हणून प्रशिक्षणार्थींना विविध AI साधने व तंत्रज्ञानाचा प्रत्यक्ष अनुभव देत त्यांचा सर्जनशील वापर समजावून सांगितला.
कार्यशाळेच्या समारोपप्रसंगी महामंडळाचे सह व्यवस्थापकीय संचालक प्रशांत साजणीकर, वित्तीय सल्लागार तथा मुख्य लेखा व वित्त अधिकारी चित्रलेखा खातू आणि मुख्य प्रशासकीय अधिकारी डॉ. विकास नाईक यांच्या हस्ते प्रशिक्षणार्थींना प्रमाणपत्रांचे वितरण करण्यात आले.
यावेळी बोलताना प्रशांत साजणीकर यांनी चित्रपट क्षेत्रातील व्यावसायिक तसेच नवोदितांना नव्या तंत्रज्ञानाची ओळख करून देणारी ही कार्यशाळा भविष्यातील चित्रनिर्मितीसाठी दिशादर्शक ठरेल, असा विश्वास व्यक्त केला.
“कृत्रिम बुद्धिमत्ता ही चित्रपट निर्मितीतील मानवी सर्जनशीलतेला पर्याय नसून तिच्या क्षमतांचा विस्तार करणारे प्रभावी साधन आहे. या तंत्रज्ञानाचा योग्य आणि सर्जनशील वापर केल्यास नवोदित तसेच व्यावसायिक चित्रपट निर्मात्यांना अधिक नाविन्यपूर्ण कलाकृती साकारता येतील. महाराष्ट्रातील चित्रपट क्षेत्राला बदलत्या तंत्रज्ञानाशी जोडणे आणि नव्या पिढीला अद्ययावत कौशल्ये उपलब्ध करून देणे, हा महामंडळाचा सातत्यपूर्ण प्रयत्न राहील.”असे प्रतिपादन व्यवस्थापकीय संचालक स्वाती म्हसे पाटील यांनी केले…
