भजनी मंडळांसाठी राज्य सरकारची खूशखबर: आर्थिक अनुदानासाठी ऑनलाइन अर्ज प्रक्रिया सुरू
भजनी मंडळांसाठी राज्य सरकारची खूशखबर: आर्थिक अनुदानासाठी ऑनलाइन अर्ज प्रक्रिया सुरू
मुंबई:
राज्यातील लोककलावंतांना आणि लोककलांना प्रोत्साहन देण्यासाठी सांस्कृतिक कार्य विभागाने भजनी मंडळांना अनुदान देण्याचा महत्त्वपूर्ण निर्णय घेतला आहे. सन २०२६-२७ या आर्थिक वर्षासाठी राज्यातील सुमारे २ हजार भजनी मंडळांना हे अनुदान दिले जाणार असून, त्यासाठी २३ सप्टेंबरपासून ऑनलाइन अर्ज मागविण्यास सुरुवात झाली आहे, अशी माहिती सांस्कृतिक कार्य मंत्री ॲड. आशिष शेलार यांनी दिली.
अनुदानासाठीची मुख्य वैशिष्ट्ये व नियम:
-
ऑनलाइन अर्ज: पात्र भजनी मंडळांना केवळ mahaanudan.org या अधिकृत संकेतस्थळावरूनच अर्ज करता येईल.
-
निवड पद्धती: अर्जांची निवड ‘प्रथम अर्ज करणाऱ्यास प्रथम प्राधान्य’ (First Come, First Served) या तत्त्वावर केली जाईल.
-
अर्जाची मुदत: २३ सप्टेंबर २०२६ ते २२ ऑक्टोबर २०२६ या कालावधीत ऑनलाइन अर्ज स्वीकारले जातील.
पात्रतेचे प्रमुख निकष:
१. भजनी मंडळ पूर्ण वेळ व्यवसाय करणारे असावे आणि त्यांनी एका वर्षात किमान ४० कार्यक्रम सादर केलेले असावेत.
२. भजनी मंडळामध्ये कमीत कमी १५ सदस्य असणे अनिवार्य आहे.
३. एका पथकाला या योजनेचा लाभ जास्तीत जास्त दोन वेळा घेता येईल.
४. एकदा अनुदान मिळाल्यानंतर संबंधित मंडळाला पुढील अनुदानासाठी किमान ३ वर्षांनंतरच अर्ज करता येईल.
राज्यातील जास्तीत जास्त पात्र भजनी मंडळांनी या योजनेचा लाभ घेण्यासाठी विहित मुदतीत अर्ज करावेत, असे आवाहन सांस्कृतिक कार्य मंत्री आशिष शेलार यांनी केले आहे.
