काळा घोडा परिसराचे सुशोभीकरण पूर्ण; मुख्यमंत्र्यांच्या हस्ते लोकार्पण

कला, वारसा आणि आधुनिक सुविधांचा संगम अनुभवणार काळा घोडा परिसर – मुख्यमंत्री देवेंद्र फडणवीस

काळा घोडा आर्ट एव्हेन्यू सुशोभीकरण प्रकल्पाचे लोकार्पण
हेरिटेज वॉकला नवे आकर्षण; पादचारी-स्नेही सुविधांवर भर

मुंबई, दि. १४ : दक्षिण मुंबईतील ऐतिहासिक काळा घोडा परिसरात राबविण्यात आलेल्या सुशोभीकरण प्रकल्पामुळे कला, वारसा आणि आधुनिक नागरी सुविधांचा सुंदर संगम साकारला असून नागरिकांना आणि पर्यटकांना या परिसराचे नवे रूप अनुभवता येणार आहे, असा विश्वास मुख्यमंत्री देवेंद्र फडणवीस यांनी व्यक्त केला.

मुख्यमंत्री देवेंद्र फडणवीस यांच्या हस्ते बी. भरूचा मार्गावरील काळा घोडा प्लाझा येथे आयोजित कार्यक्रमात काळा घोडा आर्ट एव्हेन्यू सुशोभीकरण प्रकल्पाचे लोकार्पण करण्यात आले.

यावेळी बोलताना मुख्यमंत्री म्हणाले की, नागरिकांसाठी विकसित करण्यात आलेला हा परिसर म्हणजे एक वैशिष्ट्यपूर्ण हेरिटेज वॉक आहे. येथील पादचारी मार्ग, सार्वजनिक जागा आणि परिसरातील प्रत्येक घटकाला कलात्मक स्पर्श देत वारसास्थळाच्या वास्तुशैलीशी सुसंगत रचना करण्यात आली आहे. ही उत्कृष्ट व्यवस्था दीर्घकाळ टिकून राहावी यासाठी नागरिक, पर्यटक आणि स्थानिक व्यावसायिकांनी तिची जपणूक करण्याची जबाबदारी स्वीकारावी, असे आवाहनही त्यांनी केले.

या कार्यक्रमास उपमुख्यमंत्री सुनेत्रा अजित पवार, विधानसभा अध्यक्ष ॲड. राहुल नार्वेकर, सांस्कृतिक कार्य मंत्री ॲड. आशिष शेलार, महापौर रितू तावडे, स्थायी समिती अध्यक्ष प्रभाकर शिंदे, मनपा विरोधी पक्ष नेत्या किशोरी पेडणेकर, सभागृह नेते गणेश खणकर, नगरसेवक हर्षिता नार्वेकर, बृहन्मुंबई महानगरपालिका आयुक्त अश्विनी भिडे, अतिरिक्त आयुक्त प्राजक्ता लवंगारे तसेच अन्य मान्यवर उपस्थित होते.

काळा घोडा परिसराला नवे रूप

दक्षिण मुंबईतील काळा घोडा परिसर हा युनेस्कोच्या ‘व्हिक्टोरियन गॉथिक अँड आर्ट डेको एन्सेंबल ऑफ मुंबई’ या जागतिक वारसा स्थळालगत असल्याने येथे येणाऱ्या नागरिकांना आणि पर्यटकांना अधिक समृद्ध हेरिटेज वॉकचा अनुभव मिळावा, या उद्देशाने परिसरातील प्रमुख रस्त्यांचे सुशोभीकरण करण्यात आले आहे.

या प्रकल्पांतर्गत साईबाबा मार्ग, रोप वॉक लेन, डॉ. व्ही. बी. गांधी मार्ग, फोर्ब्स स्ट्रीट, रुदरफोर्ड स्ट्रीट आणि बी. भरूचा मार्ग या सहा रस्त्यांचे सुशोभीकरण करण्यात आले आहे. या परिसरात संग्रहालये, कला दालने आणि अनेक ऐतिहासिक वास्तू असल्यामुळे त्याचे सांस्कृतिक महत्त्व अधिक अधोरेखित झाले आहे. दरवर्षी आयोजित होणारा काळा घोडा कला महोत्सवही या परिसराची सांस्कृतिक ओळख अधिक बळकट करतो.

बी. भरूचा मार्गावरील चौकात आकर्षक काळा घोडा प्लाझा विकसित करण्यात आला असून त्यासाठी करडा आणि काळा ग्रॅनाईट तसेच बेसॉल्ट फरशीचा वापर करण्यात आला आहे. प्लाझामध्ये नागरिक आणि पर्यटकांसाठी बसण्याची सुविधा, आकर्षक स्ट्रीट आर्ट भित्तिचित्रे आणि अधिक पादचारी-स्नेही सार्वजनिक जागा विकसित करण्यात आल्या आहेत. तसेच या परिसरातील खाद्यसंस्कृतीचा आनंद घेत मुंबईचे वैभव अनुभवता यावे, यासाठी टेबल-खुर्च्यांसह खुल्या बैठक व्यवस्थेचीही निर्मिती करण्यात आली आहे.