पर्यावरण दिनानिमित्त राज्यभर अत्याधुनिक स्वच्छता मोहिमेचा शुभारंभ

एसटी स्थानके, बसेस आणि प्रवासी सुविधांची दर चार तासांनी स्वच्छता

मुंबई, दि. ५ जून : जागतिक पर्यावरण दिनाचे औचित्य साधून महाराष्ट्र राज्य मार्ग परिवहन महामंडळाने राज्यव्यापी अत्याधुनिक स्वच्छता मोहिमेची सुरुवात केली आहे. मुंबईतील परळ बसस्थानक येथे परिवहन मंत्री तथा एसटी महामंडळाचे अध्यक्ष प्रताप सरनाईक यांच्या हस्ते या मोहिमेचा शुभारंभ करण्यात आला.

या उपक्रमांतर्गत राज्यातील प्रमुख बसस्थानके, एसटी बसेस, चालक-वाहक विश्रांतीगृहे आणि प्रसाधनगृहे अत्याधुनिक यंत्रसामग्रीच्या साहाय्याने नियमितपणे स्वच्छ करण्यात येणार आहेत. विशेष म्हणजे बसेस आणि प्रवासी सुविधांची दर चार तासांनी स्वच्छता करण्याची व्यवस्था करण्यात आली आहे.

कार्यक्रमात आधुनिक स्वच्छता उपकरणांचे प्रात्यक्षिक सादर करण्यात आले. राज्यभरातील बसस्थानक परिसर आंतरराष्ट्रीय दर्जाच्या स्वच्छता तंत्रज्ञानाच्या मदतीने अधिक स्वच्छ, सुरक्षित आणि प्रवासी-अनुकूल बनविण्याचा महामंडळाचा मानस आहे.

यावेळी बोलताना प्रताप सरनाईक म्हणाले, “एसटी ही महाराष्ट्राच्या जनजीवनाचा अविभाज्य भाग आहे. दररोज लाखो प्रवासी या सेवेचा लाभ घेतात. त्यामुळे त्यांना स्वच्छ, सुरक्षित आणि दर्जेदार सुविधा उपलब्ध करून देणे ही महामंडळाची जबाबदारी आहे. ही मोहीम प्रवाशांचा प्रवास अधिक सुखकर आणि समाधानकारक बनविण्यासाठी महत्त्वाची ठरेल.”

प्लास्टिक कचऱ्याचे पुनर्वापरासाठी संकलन

पर्यावरण दिनाच्या निमित्ताने सर्व बसस्थानकांवर स्वच्छता मोहिमेदरम्यान संकलित होणाऱ्या प्लास्टिकच्या बाटल्या आणि पिशव्या पुनर्वापरासाठी पाठविण्यात येणार आहेत. या कचऱ्यापासून विविध उपयुक्त आणि टिकाऊ उत्पादने तयार केली जाणार असल्याची माहिती सरनाईक यांनी दिली.

स्वच्छता ही एकदिवसीय उपक्रम नसून सातत्यपूर्ण प्रक्रिया असल्याचे सांगत त्यांनी मोहिमेवर वरिष्ठ अधिकाऱ्यांमार्फत नियमित देखरेख ठेवली जाणार असल्याचे स्पष्ट केले. तसेच प्रवाशांच्या सूचना आणि अभिप्रायांनाही विशेष महत्त्व दिले जाणार आहे.

ई-बसेससाठी विस्तारित चार्जिंग केंद्रांचे भूमिपूजन

पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या हरित वाहतूक धोरणाला अनुसरून एसटी महामंडळाने राज्यातील सर्व २५१ आगारांमध्ये ई-बसेससाठी चार्जिंग स्टेशन उभारण्याचा संकल्प केला आहे. त्याअंतर्गत परळ आगारात विस्तारित नऊ चार्जिंग केंद्रांच्या उभारणीचे भूमिपूजन प्रताप सरनाईक यांच्या हस्ते करण्यात आले.

यावेळी महामंडळाचे वरिष्ठ अधिकारी, कर्मचारी प्रतिनिधी आणि विविध मान्यवर उपस्थित होते. कार्यक्रमानंतर सरनाईक यांनी परळ बसस्थानकातील प्रवासी सुविधा, प्रतीक्षागृहे आणि प्रसाधनगृहांची पाहणी करून संबंधित अधिकाऱ्यांना आवश्यक सूचना दिल्या.

राज्यभर एकाच वेळी सुरू झालेल्या या मोहिमेमुळे एसटी स्थानकांच्या स्वच्छतेत लक्षणीय सुधारणा होऊन प्रवाशांना अधिक चांगल्या सुविधा उपलब्ध होतील, असा विश्वास यावेळी व्यक्त करण्यात आला.