मुंबई- शिवभोजन केंद्राला जागा बदल करण्याविषयी नियमात शिथिलता देण्याबाबत लवकरच शासन स्तरावरून निर्णय घेण्यात येणार आहे.दरम्यान आज शिवभोजन केंद्रांबाबत कोणत्याही प्रकारची तक्रार आल्यास अथवा कोणतीही अनियमितता आढळून आल्यास संबंधित केंद्रांची तपासणी करून नियमानुसार कारवाई करावी, असे निर्देश अन्न व नागरी पुरवठामंत्री छगन भुजबळ यांनी दिले आहेत.
भुजबळ म्हणाले, शिवभोजन केंद्र देताना दिव्यांग तसेच महिलांना प्राधान्य द्यावे. या माध्यमातून अधिकाधिक गरजू महिलांना रोजगार मिळू शकेल. राज्यात शिवभोजन योजना सर्वात लोकप्रिय ठरली आहे. सर्वसामान्य गरजू नागरिकांना या योजनेचा लाभ व्हावा यासाठी शिवभोजन केंद्रांची नियमित तपासणी करण्यात यावी.
शिवभोजन केंद्रामध्ये कोणत्याही प्रकारचा गैरप्रकार आढळला तरी तातडीने कारवाई करा, अशा सूचनाही त्यांनी यंत्रणेला दिल्या. ई-पॉस मशिनमध्ये आवश्यक बदल करण्यात येतील. याबाबत आलेल्या तक्रारी दूर करण्याचा प्रयत्न करा, असेही भुजबळ यांनी सांगितले. गरजू तसेच नियमात बसत असेल त्याला शिधापत्रिकेचे वितरण करण्याच्या सूचनाही भुजबळ यांनी केल्या.
