भावी आमदार मंगेश चिवटे : रुग्णसेवेसह शिक्षकांच्या उज्ज्वल भवितव्यासाठी अग्रेसर

ठाणे | रणवीर राजपूत

उपमुख्यमंत्री एकनाथ शिंदे यांचे विशेष कार्य अधिकारी (ओएसडी) तसेच शिवसेना वैद्यकीय मदत कक्षाचे संस्थापक प्रमुख मंगेश नरसिंह चिवटे यांना वाढदिवसानिमित्त हार्दिक शुभेच्छा. त्यांना निरोगी व दीर्घायुष्य लाभावे, ही आई जगदंबेच्या चरणी प्रार्थना.

समाजातील आर्थिकदृष्ट्या दुर्बल घटकांना महागड्या वैद्यकीय उपचारांचा खर्च परवडत नसल्याने अनेकांना जीव गमवावा लागतो. या समस्येवर उपाय म्हणून १७ नोव्हेंबर २०१७ रोजी उपमुख्यमंत्री एकनाथ शिंदे यांच्या पुढाकारातून कोपरी (ठाणे पूर्व) येथे शिवसेना वैद्यकीय मदत कक्षाची स्थापना करण्यात आली. या कक्षाची जबाबदारी मंगेश चिवटे यांच्याकडे सोपविण्यात आली आणि त्यातून राज्यातील व्यापक रुग्णसेवेची सुरुवात झाली.

“रुग्णसेवा हीच ईश्वरसेवा” हे ब्रीद अंगीकारून मंगेश चिवटे, रामहरी राऊत, ज्ञानेश्वर धुळगंडे, डॉ. निलेश देशमुख, भूषण सुर्वे आणि राज्यभरातील सुमारे १० हजार रुग्णसेवक समाजसेवेचे कार्य अविरतपणे करत आहेत.

मंगेश चिवटे यांचा जन्म १५ जून १९८८ रोजी सोलापूर जिल्ह्यातील करमाळा येथे झाला. स्वातंत्र्यसेनानी मनोहरपंत चिवटे यांच्या देशभक्त परंपरेचा वारसा त्यांना लाभला. त्यांचे वडील नरसिंह चिवटे हे सोलापूर जिल्ह्यातील प्रामाणिक आणि निर्भीड पत्रकार म्हणून ओळखले जातात. पत्नी शिल्पा चिवटे व मुलं ज्ञानेश्वर आणि मुक्ताई यांच्यासह त्यांचे संपूर्ण कुटुंब सामाजिक कार्यात सक्रिय आहे.

पत्रकारितेच्या क्षेत्रात कार्यरत असताना त्यांनी स्टार माझा, जय महाराष्ट्र, साम टीव्ही आणि आयबीएन लोकमत या वृत्तवाहिन्यांमध्ये सहाय्यक कॅमेरामन म्हणून काम केले. २६/११ मुंबई दहशतवादी हल्ल्यावेळी एटीएस प्रमुख हेमंत करकरे यांच्या सीएसटी स्थानकावरील आगमनाचे दृश्य त्यांनी कॅमेऱ्यात टिपले होते.

छत्रपती शिवाजी महाराजांच्या रायगड किल्ल्यावरील शिवमूर्तींना अखंड पुष्पहार अर्पण करण्याचा उपक्रम गेल्या सहा वर्षांपासून राबविला जात आहे. डॉ. श्रीकांत शिंदे फाउंडेशन आणि मुक्ताई गारमेंट यांच्या संयुक्त विद्यमाने परिसर स्वच्छता व संवर्धनाचे कार्यही नियमितपणे केले जाते. या उपक्रमाचे कोल्हापूरचे छत्रपती संभाजी महाराज यांनीही कौतुक केले आहे.

मुख्यमंत्री वैद्यकीय सहाय्यता निधी आणि शिवसेना वैद्यकीय मदत कक्षाच्या माध्यमातून राज्यातील हजारो रुग्णांना कर्करोग, हृदयविकार, किडनी, लिव्हर, बोन मॅरो ट्रान्सप्लांट, बायपास सर्जरी, एंजिओप्लास्टी यांसारख्या महागड्या उपचारांसाठी आर्थिक मदत उपलब्ध करून देण्यात आली आहे. राज्यातील सुमारे ६० हजारांहून अधिक रुग्णांवर मोफत किंवा अल्पदरात उपचार करण्यात आले असून हजारो बालकांच्या हृदय शस्त्रक्रियाही यशस्वीरीत्या पार पडल्या आहेत.

उपमुख्यमंत्री एकनाथ शिंदे यांच्या षष्ठीपूर्तीनिमित्त आयोजित ‘हीरक आरोग्य वर्ष’ उपक्रमांतर्गत मंगेश चिवटे यांच्या मार्गदर्शनाखाली राज्यभर आरोग्य संवाद यात्रा काढण्यात आली. तसेच ज्येष्ठ नागरिकांच्या मोतीबिंदू शस्त्रक्रिया, महाआरोग्य शिबिरे आणि मोफत आरोग्य तपासणी उपक्रम राबविण्यात आले.

मस्क्युलर डिस्ट्रॉफी सारख्या दुर्मिळ आजारांशी झुंज देणाऱ्या रुग्णांना इलेक्ट्रिक व्हीलचेअर आणि बायपॅप मशीनचे मोफत वितरण करण्यात आले. तसेच दिव्यांग बांधवांसाठी ठाण्यातील आनंदाश्रम येथे मोफत मॉड्युलर हात-पाय बसविण्याचा उपक्रमही यशस्वीपणे सुरू आहे.

मुंबईतील टाटा रुग्णालयात कर्करोग उपचारासाठी येणाऱ्या रुग्ण व त्यांच्या नातेवाईकांसाठी प्रत्येक रविवारी भोजन व औषध वाटपाची व्यवस्था शिवसेना वैद्यकीय मदत कक्ष आणि करुणा सेवा ट्रस्टच्या संयुक्त विद्यमाने करण्यात येते. या उपक्रमामुळे अनेक गरजू कुटुंबांना मोठा दिलासा मिळाला आहे.

आरोग्य क्षेत्रातील उल्लेखनीय योगदानाबद्दल मंगेश चिवटे यांना नवी दिल्ली येथे केंद्रीय मंत्री नितीन गडकरी यांच्या हस्ते ‘अटल श्री पुरस्कार’ प्रदान करण्यात आला. तसेच विविध सामाजिक संस्थांकडून आणि माध्यम समूहांकडून त्यांना अनेक सन्मान मिळाले आहेत.

एम.ए., बी.एड., एलएल.बी. आणि पत्रकारिता पदविकाधारक असलेले मंगेश चिवटे आता समाजकारणाबरोबरच सक्रिय राजकारणातही पुढे येत आहेत. विशेषतः शिक्षकांच्या प्रलंबित प्रश्नांच्या सोडवणुकीसाठी त्यांनी गेल्या काही महिन्यांत सातत्याने प्रयत्न सुरू ठेवले आहेत. शिक्षक संघटनांच्या प्रतिनिधींना सोबत घेऊन त्यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची भेट घेऊन विविध मागण्यांसंदर्भात निवेदने सादर केली आहेत.

शिक्षक, कर्मचारी आणि सर्वसामान्य नागरिकांच्या प्रश्नांसाठी सातत्याने काम करणारे मंगेश चिवटे यांना त्यांच्या पुढील सामाजिक व सार्वजनिक जीवनासाठी मनःपूर्वक शुभेच्छा.

जय महाराष्ट्र!