मुंबई- राज्यात कोरोना संसर्ग पुन्हा एकदा झपाट्याने वाढू लागला आहे. मुंबई, पुणेसह अन्य प्रमुख शहरांमध्ये दररोज आढळणाऱ्या कोरोनाबाधितांच्या संख्येत दिवसेंदिवस वाढ होताना दिसत आहे. आज दिवसभरात राज्यात आढळलेल्या नवीन कोरोनाबाधितांची संख्या ही तब्बल ८ हजारांच्याही पुढे गेली आहे. त्यामुळे निश्चितच ही चिंताजनक बाब आहे.
आज दिवसभरात राज्यात ८ हजार ६७ नवीन कोरोनाबाधित आढळून आले आहेत. तर, आठ कोरोनाबाधितांचा मृत्यू झाला आहे. सध्या राज्यातील मृत्यूदर २.११ टक्के एवढा आहे.याशिवाय राज्यात आज १ हजार ७६६ रुग्ण कोरोनामुक्त झाले आहेत. राज्यात आजपर्यंत एकूण ६५,०९,०९६ कोरोनाबाधित रुग्ण बरे होऊन घरी परतले आहेत. यामुळे राज्यातील रुग्ण बरे होण्याचे प्रमाण म्हणजेच रिकव्हरी रेट ९७.४६ टक्के एवढा झाला आहे.
आजपर्यंत तपासण्यात आलेल्या ६,९०,१०,१५३ प्रयोगशाळा नमुन्यांपैकी ६६,७८,८२१ नमुने पॉझिटिव्ह आले आहेत. सध्या राज्यात १,७५,५९२ व्यक्ती होमक्वारंटाईनमध्ये आहेत, तर १०७९ व्यक्ती संस्थात्मक क्वारंटाईनमध्ये आहेत.
पुण्यात आज ४१२ नवीन कोरोनाबाधित आढळले असून, येथील अॅक्टीव्ह केसेसची संख्या १ हजार ७९९ असल्याची माहिती पुणे महापालिकेकडून देण्यात आली आहे.तर मुंबईत कोरोना रूग्णांची संख्या वाढू नये यासाठी विशेष काळजी घेतली जात आहे.
