होर्डिंगसाठी ६३ झाडांची बेकायदेशीर छाटणी; संबंधित कंपनीवर एफआयआर दाखल करण्याचे आशिष शेलार यांचे निर्देश
मुंबई, दि. ११ जून २०२६ : अंधेरी (पश्चिम) येथील न्यू लिंक रोड परिसरात जाहिरात फलकांना स्पष्ट दृश्यता मिळावी यासाठी तब्बल ६३ झाडांची अनधिकृतपणे छाटणी करण्यात आल्याचा गंभीर प्रकार उघडकीस आला आहे. या प्रकरणी संबंधित जाहिरात कंपनीवर तातडीने एफआयआर दाखल करण्याचे निर्देश मुंबई उपनगरचे पालकमंत्री तथा माहिती तंत्रज्ञान आणि सांस्कृतिक कार्य मंत्री ॲड. आशिष शेलार यांनी संबंधित अधिकाऱ्यांना दिले आहेत.
स्थानिक नगरसेवक रुपेश सावरकर यांनी या संदर्भात पालकमंत्र्यांकडे लेखी तक्रार केली होती. त्यानंतर उपनगर जिल्हाधिकारी कार्यालयात झालेल्या बैठकीत हा मुद्दा उपस्थित करण्यात आला. न्यू लिंक रोड परिसरातील होर्डिंग्जना अधिक स्पष्टता मिळावी यासाठी मोठ्या प्रमाणात झाडांच्या फांद्या छाटण्यात आल्याचे सावरकर यांनी निदर्शनास आणून दिले.
याबाबत विचारणा केल्यानंतर महानगरपालिका अधिकाऱ्यांनी झाडांची छाटणी झाल्याचे मान्य केले. तसेच परिमंडळ कार्यालय आणि आंबोली पोलीस ठाण्याकडे प्राथमिक तक्रार दाखल केल्याची माहिती दिली. मात्र अद्याप संबंधित कंपनीविरोधात एफआयआर दाखल करण्यात आलेला नसल्याचे नगरसेवक सावरकर यांनी बैठकीत स्पष्ट केले.
या गंभीर बाबीची दखल घेत पालकमंत्री आशिष शेलार यांनी संबंधित जाहिरात परवानग्यांची तातडीने तपासणी करून दोषी जाहिरात कंपनीवर कायदेशीर कारवाई करावी आणि तत्काळ एफआयआर दाखल करावा, असे निर्देश पोलीस आणि प्रशासनाला दिले.
