हाफकिन संस्थेला १५० कोटींचा निधी द्या; खासगीकरणावर सरकारने भूमिका स्पष्ट करावी : विजय वडेट्टीवार

हाफकिन संस्थेचे खासगीकरण होणार नाही, याची सरकारने स्पष्ट हमी द्यावी; संस्थेला १५० कोटींचा निधी देण्याची विजय वडेट्टीवार यांची विधानसभेत मागणी

मुंबई, दि. ३ : विधानसभेत हाफकिन संस्थेच्या भवितव्याचा मुद्दा उपस्थित करत काँग्रेस विधिमंडळ नेते विजय वडेट्टीवार यांनी संस्थेच्या कथित खासगीकरणाच्या हालचालींबाबत तीव्र चिंता व्यक्त केली. हाफकिनसारख्या ऐतिहासिक आणि सार्वजनिक आरोग्याच्या दृष्टीने महत्त्वाच्या संस्थेचे खासगीकरण होणार नाही, याची सरकारने स्पष्ट हमी द्यावी, तसेच संस्थेच्या बळकटीकरणासाठी तातडीने १५० कोटी रुपयांचा निधी उपलब्ध करून द्यावा, अशी मागणी त्यांनी केली.

वडेट्टीवार म्हणाले की, हाफकिन संस्थेच्या खासगीकरणाचा विषय यापूर्वीही चर्चेत आला होता. सुरुवातीला सरकारने संस्थेची एक इंचही जमीन देण्यात आलेली नसल्याचे सांगितले होते. मात्र, त्यानंतर संशोधन केंद्रासाठी टाटा समूहाला पाच एकर जमीन कराराद्वारे देण्यात आल्याचे समोर आले. त्यामुळे सरकारच्या भूमिकेत विसंगती दिसून येत असून या संपूर्ण प्रकरणात अधिक पारदर्शकता आवश्यक असल्याचे त्यांनी नमूद केले.

हाफकिन संस्थेला त्रिवेणी लस निर्मिती प्रकल्प आणि आधुनिक यंत्रसामग्रीसाठी सुमारे १५० कोटी रुपयांच्या निधीची आवश्यकता असल्याचे सरकारचेच म्हणणे आहे. एवढ्या मर्यादित गुंतवणुकीत संस्था सक्षम होऊ शकत असताना, हजारो कोटी रुपयांच्या मालमत्तेवर खासगी कंपन्यांची नजर का आहे, असा सवाल वडेट्टीवार यांनी उपस्थित केला. सुमारे १,५०० कोटी रुपयांच्या संस्थेच्या मालमत्तेबाबत खासगी हितसंबंध निर्माण होण्याची शक्यता व्यक्त करत त्यांनी सरकारने यावर स्पष्ट भूमिका जाहीर करण्याची मागणी केली.

हाफकिनसारखी सार्वजनिक आरोग्य क्षेत्रातील महत्त्वाची आणि ऐतिहासिक संस्था खासगीकरणाच्या मार्गावर नेली जाणार नाही, याची स्पष्ट ग्वाही सरकारने सभागृहात द्यावी, असेही त्यांनी ठामपणे सांगितले.

यावर उत्तर देताना संबंधित मंत्र्यांनी हाफकिन संस्थेचे खासगीकरण करण्यात येणार नसल्याचे स्पष्ट केले. तसेच मुख्यमंत्री यांच्या अध्यक्षतेखाली संबंधित अधिकारी आणि आमदारांची बैठक आयोजित करून संस्थेच्या बळकटीकरणासाठी आवश्यक उपाययोजनांवर निर्णय घेतला जाईल, असे आश्वासन त्यांनी सभागृहात दिले.