महागाईविरोधात शिवसेना (उद्धव बाळासाहेब ठाकरे) यांचा गोरेगावमध्ये जोरदार एल्गार; सर्वसामान्य नागरिकांचाही सहभाग
मुंबई, दि. (प्रतिनिधी): पेट्रोल, डिझेल, एलपीजी आणि सीएनजी दरवाढीविरोधात शिवसेना (उद्धव बाळासाहेब ठाकरे) पक्षाच्या वतीने गोरेगाव (प.) येथे जोरदार एल्गार आंदोलन करण्यात आले. गोरेगाव पश्चिम येथील रोड ते रत्ना हॉटेल परिसरात झालेल्या या आंदोलनात पक्षाचे नेते, पदाधिकारी तसेच मोठ्या संख्येने सर्वसामान्य नागरिक सहभागी झाले होते.
देशासह राज्यात झालेल्या इंधन दरवाढीमुळे सर्वसामान्य नागरिकांचे आर्थिक बजेट कोलमडले असून, जीवनावश्यक वस्तूंच्या किमतीही वाढल्या आहेत. या पार्श्वभूमीवर महागाईविरोधात रस्त्यावर उतरून निषेध नोंदवण्यात आला.
आंदोलनादरम्यान कार्यकर्त्यांनी रस्त्यावर चूल पेटवून आणि गॅस सिलिंडर ठेवून महागाईचा निषेध व्यक्त केला. तसेच केंद्र सरकारविरोधात घोषणा देत पोस्टर आणि बॅनर फडकावण्यात आले.
शिवसेना विभाग क्रमांक ३ च्या वतीने झालेल्या या आंदोलनाचे नेतृत्व माजी उद्योगमंत्री व शिवसेना नेते सुभाष देसाई, तसेच आमदार सुनील प्रभू यांनी केले. यावेळी आमदार अंनत (बाळा) नर, विभाग संघटक शालिनी सावंत, विभाग समन्वयक दीपक सुर्वे, विधानसभा प्रमुख विश्वनाथ सावंत, प्रशांत कदम, विधानसभा संघटक राजू पाध्ये, नगरसेवक अंकित प्रभू, सुहास वाडकर, तुळशीराम शिंदे, जितेंद्र वळवी, कैलाशनाथ पाठक, नगरसेविका लक्ष्मी भाटीया, योगिता कदम, पुष्पा कळबें, लोणा रावत, शिवानी परब तसेच अनेक पदाधिकारी व कार्यकर्ते उपस्थित होते.
दरम्यान, आंदोलनादरम्यान आमदार सुनील प्रभू यांनी बैलगाडीतून प्रवास करून आंदोलन करण्याचा प्रयत्न केला असता पोलिसांनी त्यास परवानगी नाकारली. त्यानंतर त्यांनी हातगाडीचा वापर करत आंदोलनात सहभाग घेतला.
पत्रकारांशी बोलताना आमदार सुनील प्रभू यांनी केंद्र व राज्य सरकारवर टीका करत महागाईवर तातडीने नियंत्रण आणावे, अशी मागणी केली. दरवाढ मागे न घेतल्यास राज्यभर अधिक तीव्र आंदोलन छेडले जाईल, असा इशाराही त्यांनी दिला.
