सायन रुग्णालयातील डॉक्टरांच्या निष्काळजीपणाची सखोल चौकशी करून कठोर कारवाई करावी; आमदार सुनील प्रभू यांची विधानसभेत मागणी
मुंबई (प्रतिनिधी): सायन रुग्णालयातील कथित वैद्यकीय निष्काळजीपणामुळे एका रुग्णाचा अंगठा कापला गेल्याची गंभीर घटना समोर आली आहे. या प्रकरणाची सखोल चौकशी करून संबंधित दोषींवर कठोर कारवाई करावी, तसेच बाधित रुग्णाला योग्य नुकसानभरपाई देण्याची कार्यवाही करावी, अशी मागणी शिवसेना पक्षाचे मुख्य प्रतोद आमदार सुनील प्रभू यांनी विधानसभेत औचित्याच्या मुद्द्याद्वारे केली.
आमदार सुनील प्रभू यांनी सभागृहात सांगितले की, गोरेगाव (पूर्व) येथील सोनावाला क्रॉस रोड, अमिन इंडस्ट्रियल, सरदार केरसिंग चाळ येथे राहणारे विनय तिवारी हे एका खासगी उद्योगात काम करत असताना त्यांचा अंगठा मशीनमध्ये दबल्याने जखमी झाला. प्राथमिक उपचारासाठी त्यांनी जोगेश्वरी येथील ट्रॉमा केअर सेंटरमध्ये धाव घेतली. तेथील डॉक्टरांनी अंगठ्याला फ्रॅक्चर असल्याचे सांगून स्प्लिंट व टाके घालून उपचार शक्य असल्याचे स्पष्ट केले. मात्र, आवश्यक सुविधा उपलब्ध नसल्याने त्यांना पुढील उपचारासाठी सायन किंवा नायर रुग्णालयात जाण्याचा सल्ला देण्यात आला.
त्यानंतर विनय तिवारी उपचारासाठी सायन रुग्णालयात दाखल झाले. तेथे वरिष्ठ डॉक्टरांनी स्वतः उपचार न करता कंपाऊंडरकडे उपचाराची जबाबदारी सोपवल्याचा आरोप करण्यात आला आहे. संबंधित कंपाऊंडरने यापूर्वी अशा प्रकारच्या जखमेवर उपचाराचा अनुभव नसल्याचे वरिष्ठ डॉक्टरांना सांगितले, तरीही त्याकडे दुर्लक्ष करण्यात आल्याचा दावा आमदार प्रभू यांनी केला.
याच निष्काळजीपणामुळे भूल देऊन विनय तिवारी यांचा चांगल्या स्थितीत असलेला अंगठा कापण्यात आल्याचा गंभीर आरोप करण्यात आला आहे. या घटनेमुळे तिवारी यांना शारीरिक, मानसिक आणि आर्थिक मोठा त्रास सहन करावा लागला असून त्यांच्या शरीराचा कायमस्वरूपी अवयव गमवावा लागला आहे.
या संपूर्ण प्रकरणाची निष्पक्ष आणि सखोल चौकशी करून दोषींवर कठोर कारवाई करण्यात यावी तसेच बाधित रुग्णाला न्याय मिळावा आणि योग्य नुकसानभरपाई देण्यात यावी, अशी मागणी आमदार सुनील प्रभू यांनी विधानसभेत केली.
