सावंतवाडीत ‘केसरकर’ विरुद्ध ‘राणे’ संघर्ष शिगेला! पालकमंत्री नितेश राणे दीपक केसरकरांच्या प्रयत्नांना सुरुंग लावण्याच्या तयारीत?
मुंबई : सिंधुदुर्गात महायुतीतील वाद थांबवण्यासाठी ज्येष्ठ नेते नारायण राणे आणि शिंदे गटाचे माजी मंत्री, आमदार दीपक केसरकर प्रयत्न करताना दिसत आहेत. नारायण राणे यांनी तर “महायुती म्हणून न लढल्यास शिवसेनेशी संबंध तोडू” असा इशाराच दिला होता. त्यानंतर केसरकर यांनी किमान आपल्या सावंतवाडी मतदारसंघात युती टिकावी म्हणून भाजपशी चर्चा सुरू केली आहे. या चर्चेच्या दोन फेऱ्या झाल्या असून अद्याप निर्णय झालेला नाही. तसेच येथील नगराध्यक्षपद शिवसेनेला सोडावे, अशी मागणी केसरकर यांनी केली आहे.
मात्र आता वडील नारायण राणे आणि केसरकर यांच्या या प्रयत्नांना सिंधुदुर्गचे पालकमंत्री नितेश राणे यांनी सुरूंग लावल्याचे समोर येत आहे. भाजपकडून त्यांनी नगराध्यक्षपदासाठी युवराज्ञी श्रद्धाराजे भोसले यांची उमेदवारी निश्चित केल्याची चर्चा येथे रंगली असून त्यामुळे महायुतीत पुन्हा खळबळ उडाली आहे.
पालकमंत्री नितेश राणे सोमवारी (ता. १०) सिंधुदुर्गच्या दौऱ्यावर आले होते. यावेळी त्यांनी आगामी स्थानिक स्वराज्य संस्थांच्या निवडणुका आणि सध्या जाहीर झालेल्या नगरपरिषद निवडणुकांच्या पार्श्वभूमीवर बैठक घेतली. हा दौरा खासदार नारायण राणे यांनी महायुतीबाबत केलेल्या भूमिकेनंतर झाल्याने, जिल्ह्याचे लक्ष या बैठकीकडे लागले होते. ते कोणता निर्णय घेतात याकडे शिवसेनेचेही लक्ष होते.
दौऱ्यात नितेश राणे यांनी प्रथम भाजप कार्यालयात, आणि त्यानंतर राजवाड्यावर बंद दाराआड चर्चा करत युतीबाबत चर्चा केली, असे समजते. तसेच भाजपकडून नगराध्यक्षपदासाठी युवराज्ञी श्रद्धाराजे भोसले यांची उमेदवारी निश्चित केल्याची चर्चा राजकीय वर्तुळात जोरदार रंगली आहे.
