खासदार रवींद्र वायकर यांच्या पाठपुराव्याला यश; इस्माईल युसूफ महाविद्यालयात ३२० क्षमतेचे महिला वसतिगृह आणि १५० फुटी राष्ट्रध्वजाला मंजुरी

मुंबई : जोगेश्वरी (पूर्व) येथील ऐतिहासिक इस्माईल युसूफ महाविद्यालयाच्या परिसरात ३२० क्षमतेचे महिला वसतिगृह आणि १५० फूट उंचीचा भव्य राष्ट्रध्वज उभारण्याच्या मागणीला मंजुरी मिळाली आहे. मुंबई उत्तर-पश्चिम लोकसभा मतदारसंघाचे खासदार रवींद्र वायकर यांनी २०२० पासून या दोन्ही मागण्यांसाठी राज्य शासनाकडे सातत्याने पाठपुरावा केला होता. उच्च व तंत्रशिक्षण मंत्री चंद्रकांत पाटील यांनी या प्रस्तावांना सकारात्मक प्रतिसाद देत संबंधित अधिकाऱ्यांना प्रस्ताव लवकरात लवकर सादर करण्याच्या सूचना दिल्या.

इस्माईल युसूफ महाविद्यालयात सुमारे ६ हजारांहून अधिक विद्यार्थी शिक्षण घेत आहेत. मुंबईत राज्याच्या विविध भागांतून तसेच देशाच्या इतर भागांतून शिक्षण आणि रोजगारासाठी मोठ्या संख्येने महिला येतात. मात्र, सुरक्षित आणि परवडणाऱ्या निवासाची सुविधा उपलब्ध नसल्यामुळे अनेक विद्यार्थिनींना उच्च शिक्षणासाठी मुंबईत येण्यास अडचणी निर्माण होतात. ही बाब लक्षात घेऊन महाविद्यालयाच्या परिसरात महिला वसतिगृह उभारण्याची मागणी खासदार वायकर यांनी केली होती.

या मागणीसाठी वायकर यांनी २०२० पासून तत्कालीन उपमुख्यमंत्री, उच्च व तंत्रशिक्षण मंत्री तसेच संबंधित अधिकाऱ्यांशी पत्रव्यवहार केला. तसेच विधानसभेत तारांकित प्रश्नाच्या माध्यमातूनही हा मुद्दा उपस्थित केला होता.

३२० क्षमतेचे महिला वसतिगृह

इस्माईल युसूफ महाविद्यालयाच्या परिसरात विद्यार्थिनी आणि नोकरदार महिलांसाठी ३२० प्रवेश क्षमतेचे सुसज्ज वसतिगृह उभारण्याची मागणी करण्यात आली होती. या प्रकल्पासाठी पहिल्या टप्प्यात १३.५० कोटी रुपयांचा निधी मंजूर करण्यात आला होता. सार्वजनिक बांधकाम विभागाने यासाठी अंदाजपत्रकही तयार केले होते. मात्र, त्यानंतर या कामाला अपेक्षित गती मिळाली नाही.

आता उच्च व तंत्रशिक्षण मंत्री चंद्रकांत पाटील यांनी या वसतिगृहासाठी आवश्यक निधी आणि प्रशासकीय मंजुरी देण्याच्या प्रक्रियेला गती देण्याचे निर्देश दिले आहेत.

१५० फुटी भव्य राष्ट्रध्वज

महाविद्यालयाच्या मोकळ्या परिसरात १५० फूट उंचीचा भव्य राष्ट्रध्वज उभारण्याचा प्रस्तावही खासदार रवींद्र वायकर यांनी मांडला होता. ‘हर घर तिरंगा’ उपक्रमाच्या पार्श्वभूमीवर या राष्ट्रध्वजामुळे विद्यार्थी आणि नागरिकांमध्ये राष्ट्रभावना दृढ होण्यास मदत होईल, अशी भूमिका वायकर यांनी मांडली.

राष्ट्रध्वज उभारण्यासाठी आवश्यक ना-हरकत प्रमाणपत्र मिळाल्यानंतर सार्वजनिक बांधकाम विभागामार्फत हे काम पूर्ण करण्याचा प्रस्ताव आहे. जिल्हा नियोजन समितीकडून निधी उपलब्ध न झाल्यास खासदार निधीतून काम करण्याची तयारीही वायकर यांनी व्यक्त केली आहे.

या दोन्ही प्रस्तावांना मंजुरी देऊन संबंधित अधिकाऱ्यांना पुढील कार्यवाही करण्याच्या सूचना मंत्री चंद्रकांत पाटील यांनी दिल्या आहेत. मागण्यांना सकारात्मक प्रतिसाद दिल्याबद्दल खासदार रवींद्र वायकर यांनी मंत्री चंद्रकांत पाटील यांचे आभार मानले असून, दोन्ही कामांना लवकरात लवकर सुरुवात करण्याची विनंती केली आहे.