दुष्काळग्रस्त २६५ तालुक्यांतील विद्यार्थ्यांसाठी विद्यापीठ स्तरावर टास्क फोर्स स्थापन करा – चंद्रकांतदादा पाटील

मुंबई, दि. १ : राज्यातील दुष्काळी परिस्थिती घोषित केलेल्या भागातील विद्यार्थ्यांचे शिक्षण आर्थिक अडचणींमुळे थांबू नये, यासाठी उच्च व तंत्र शिक्षण विभागाने पुढाकार घेतला आहे. दुष्काळी परिस्थिती घोषित केलेल्या ३४ जिल्ह्यांतील २६५ तालुक्यांमधील विद्यार्थ्यांना परीक्षा शुल्क माफीसह आवश्यक ती इतर मदत मिळावी, यासाठी प्रत्येक विद्यापीठ स्तरावर टास्क फोर्स स्थापन करण्याचे निर्देश उच्च व तंत्र शिक्षण मंत्री चंद्रकांतदादा पाटील यांनी दिले.

चंद्रकांतदादा पाटील यांच्या अध्यक्षतेखाली राज्यातील सर्व सार्वजनिक विद्यापीठांचे कुलगुरू, प्र-कुलगुरू, कुलसचिव आणि महाविद्यालयांच्या प्राचार्यांची ऑनलाइन आढावा बैठक घेण्यात आली. यावेळी विभागाचे अपर मुख्य सचिव वेणुगोपाल रेड्डी आणि उच्च शिक्षण संचालक शैलेंद्र देवळाणकर उपस्थित होते.

मंत्री पाटील यांनी सांगितले की, मदत व पुनर्वसन विभागाने राज्यातील ३४ जिल्ह्यांमधील २६५ तालुक्यांमध्ये दुष्काळी परिस्थिती जाहीर केली आहे. या पार्श्वभूमीवर संबंधित भागातील विद्यार्थ्यांना दिलासा देण्यासाठी उच्च शिक्षण संचालनालयाने परीक्षा शुल्क माफीबाबत परिपत्रक जारी केले आहे. त्यानुसार नोव्हेंबर-डिसेंबरमध्ये होणाऱ्या प्रथम सत्राच्या परीक्षांसाठी पात्र विद्यार्थ्यांकडून परीक्षा शुल्क आकारण्यात येऊ नये.

शासन निर्णयाच्या अंमलबजावणीपुरते मर्यादित राहू नका

केवळ शासन निर्णयाची अंमलबजावणी करून थांबू नये, असे निर्देश मंत्री पाटील यांनी दिले. अतिवृष्टीच्या काळात राबविण्यात आलेल्या मेंटर-मेंटी योजनेप्रमाणे दुष्काळग्रस्त विद्यार्थ्यांच्या मदतीसाठीही महाविद्यालयांनी पुढाकार घ्यावा, असे त्यांनी सांगितले.

सक्षम महाविद्यालयांनी दुष्काळाची तीव्रता अधिक असलेल्या भागातील महाविद्यालये आणि विद्यार्थ्यांना आवश्यक मदत उपलब्ध करून द्यावी. उच्च शिक्षण क्षेत्राने या परिस्थितीकडे केवळ औपचारिकता म्हणून न पाहता एक कुटुंब म्हणून एकत्रितपणे विद्यार्थ्यांना आधार द्यावा, असे आवाहन त्यांनी केले.

विद्यापीठ स्तरावर टास्क फोर्स

उपक्रमांची प्रभावी अंमलबजावणी सुनिश्चित करण्यासाठी उच्च शिक्षण संचालनालयात स्वतंत्र कक्ष स्थापन करण्याचे निर्देश देण्यात आले. त्याचबरोबर प्रत्येक विद्यापीठात टास्क फोर्स स्थापन करून महाविद्यालयांच्या माध्यमातून विद्यार्थ्यांसाठी मदतकार्य सुरू करण्याचे सांगण्यात आले.

विद्यापीठे आणि महाविद्यालयांकडून विद्यार्थ्यांसाठी करण्यात येणाऱ्या उपाययोजनांचा दर १५ दिवसांनी आढावा घेण्यात यावा, असेही मंत्री चंद्रकांतदादा पाटील यांनी स्पष्ट केले.