प्रेस नोट

अल्पसंख्याक विभागातील रिक्त पदे तातडीने भरा; योजनांचा लाभ पात्र लाभार्थ्यांपर्यंत पोहोचवा – उपमुख्यमंत्री सुनेत्रा अजित पवार

मुंबई, दि. ३ जून : अल्पसंख्याक समाजाच्या शैक्षणिक, सामाजिक आणि आर्थिक विकासासाठी राज्य शासन कटिबद्ध असून, विभागातील रिक्त पदे निश्चित कालमर्यादेत भरून प्रशासन अधिक सक्षम करावे. तसेच अल्पसंख्याक विकास विभागामार्फत राबविण्यात येणाऱ्या विविध वैयक्तिक लाभाच्या योजनांचा लाभ पात्र लाभार्थ्यांपर्यंत प्रभावीपणे पोहोचविण्यासाठी विशेष प्रयत्न करण्यात यावेत, असे निर्देश उपमुख्यमंत्री तथा अल्पसंख्याक विकास मंत्री सुनेत्रा अजित पवार यांनी दिले.

महाराष्ट्र विधानसभा नियम १०५ अंतर्गत उपस्थित करण्यात आलेल्या लक्षवेधी सूचनेच्या अनुषंगाने देण्यात आलेल्या आश्वासनांच्या पूर्ततेसंदर्भात सह्याद्री अतिथीगृह येथे उपमुख्यमंत्री सुनेत्रा अजित पवार यांच्या अध्यक्षतेखाली आढावा बैठक आयोजित करण्यात आली होती. या बैठकीस आमदार अबू आझमी हे दूरदृश्य प्रणालीद्वारे सहभागी झाले होते. तसेच आमदार सना मलिक-शेख, आमदार रईस शेख, उपमुख्यमंत्र्यांचे सचिव डॉ. राजेश देशमुख आणि संबंधित विभागांचे वरिष्ठ अधिकारी उपस्थित होते.

बैठकीत अल्पसंख्याक समाजाच्या शैक्षणिक, सामाजिक, आर्थिक आणि सांस्कृतिक उन्नतीसाठी राबविण्यात येणाऱ्या विविध योजनांचा सविस्तर आढावा घेण्यात आला. शासनाच्या कल्याणकारी योजनांचा लाभ समाजातील शेवटच्या घटकापर्यंत पोहोचविण्यासाठी प्रशासनाने अधिक सक्रिय, संवेदनशील आणि परिणामकारक पद्धतीने कार्य करणे आवश्यक असल्याचे उपमुख्यमंत्री सुनेत्रा पवार यांनी यावेळी नमूद केले.

अल्पसंख्याक समाजातील विद्यार्थ्यांना दर्जेदार शिक्षणाच्या संधी उपलब्ध करून देणे आणि विशेषतः मुलींना उच्च व तांत्रिक शिक्षणासाठी आवश्यक सुविधा निर्माण करणे ही काळाची गरज असल्याचे त्यांनी सांगितले. शिक्षण हे सामाजिक परिवर्तनाचे प्रभावी माध्यम असून त्याद्वारे समाजाच्या सर्वांगीण प्रगतीला नवी दिशा मिळू शकते, असेही त्यांनी अधोरेखित केले.

बैठकीत महाराष्ट्र राज्य अल्पसंख्याक संशोधन व प्रशिक्षण संस्था (MARTI) यांच्या कार्याचा सविस्तर आढावा घेण्यात आला. संस्थेच्या प्रशिक्षण, संशोधन आणि शैक्षणिक उपक्रमांना अधिक बळकटी देणे, विद्यार्थ्यांसाठी उपलब्ध सुविधांचा विस्तार करणे तसेच संस्थेच्या कामकाजाची व्याप्ती वाढविण्यासंदर्भात विविध मुद्द्यांवर चर्चा करण्यात आली.

अल्पसंख्याक समाजातील युवकांना आधुनिक शिक्षण, कौशल्य विकास आणि तंत्रज्ञानाधारित प्रशिक्षणाशी जोडण्यासाठी प्रभावी उपाययोजना राबविण्याबाबतही बैठकीत विचारविनिमय करण्यात आला. रोजगाराभिमुख प्रशिक्षण, उद्योजकता विकास आणि कौशल्यवृद्धी कार्यक्रमांच्या माध्यमातून युवकांना आत्मनिर्भर व सक्षम बनविण्यावर शासनाचा विशेष भर राहणार असल्याचे उपमुख्यमंत्री सुनेत्रा अजित पवार यांनी स्पष्ट केले.

याशिवाय, हज समितीमधील रिक्त जागांबाबत आवश्यक कार्यवाही करण्यासाठी केंद्र शासनाशी समन्वय साधून पत्रव्यवहार करावा तसेच प्रलंबित विषयांचा नियमित पाठपुरावा करून त्यांचा लवकरात लवकर निपटारा करावा, असे निर्देशही त्यांनी संबंधित अधिकाऱ्यांना दिले.

अल्पसंख्याक समाजाच्या सर्वांगीण विकासासाठी शासनाच्या विविध विभागांनी परस्पर समन्वयाने कार्य करून योजनांची प्रभावी अंमलबजावणी सुनिश्चित करावी, असे निर्देश देत उपमुख्यमंत्री सुनेत्रा अजित पवार यांनी प्रशासनाने अधिक उत्तरदायी आणि परिणामकारक पद्धतीने काम करण्याचे आवाहन केले.