महाड: चिपळूणपाठोपाठ आता रायगड जिल्ह्यातील महाडमध्येही महापुराने थैमान घातलेले पाहायला मिळत आहे. महाड शहराला पुराच्या पाण्याचा वेढा पडला आहे. सावित्री नदीचं पाणी शिरल्यामुळे शहरातील सर्वच भागात ८ ते १० फुटाच्या वर पाणी साचलं आहे. अशावेळी बचावकार्यासाठी एनडीआरएफच्या टीम पाचारण करण्यात आल्या आहेत. पण सर्वच रस्ते बंद झाल्यामुळे एनडीआरएफच्या जवानांना शहरात जाण्यास अडचणी येत आहेत. अशावेळी रायगडच्या जिल्हाधिकारी निधी चौधरी यांनी आपत्ती व्यवस्थापन, मदत आणि पुनर्वसन विभागाकडे हेलिकॉप्टरची मागणी केली आहे.
याचबरोबर जे लोक घरात अथवा कुठेही अडकले असतील तर त्यांनी आपले नाव, अडकलेल्या ठिकाणचा पत्ता संपर्क क्रमांक,तसेच जमल्यास जीपीएस लोकेशन खालील क्रमांकावर पाठवण्याचे आवाहन रायगड-अलिबाग आपत्ती व्यवस्थापन विभागामार्फत करण्यात आले आहे
जिल्हा आपत्ती व्यवस्थापन कक्ष-02141-222097 / 227452, मोबाईल क्रमांक 8275152363
